Azərbaycan, Lənkəran / Trend müxbir P.Əliyeva/ Fövqəladə Hallar Nazirliyinin (FHN) və Dövlət Layihə İnstitutunun əməkdaşları çərşənbə axşamı Lənkəran şəhərindəki Şəhidlər Xiyabanı 46/2 saylı ünvanda yerləşən, qəzalı vəziyyətdə olan 60 mənzilli 5 mərtəbəli yaşayış binasına bir daha baxış keçirib.
Həmin binaya ötən il martın 1-də FHN mütəxəssislərinin keçirdiyi baxışdan sonra məlum olub ki, binanın yük daşıyan konstruksiyalarında nöqsanlar, zədə və deformasiyalar mövcuddur. Binanın qəza vəziyyətində və istismarının təhlükəli olduğu müəyyənləşib. Baş verə biləcək bədbəxt hadisələrin qarşısının alınması üçün təcili olaraq sakinlərin binadan köçürülməsi, bütün kommunikasiya xəttlərinin kəsilməsi, binanın istimarının dayandırılması vacib sayılıb.
Binanın sakinlərinin dediyinə görə, 2004-cü ildə binada tikinti mayakları qoyulub, heç bir çat yoxdur. Sakinlər binanın sökülməsini yox, yenidən bərpa-gücləndirmə tədbirlərinin görülməsini istəyirlər. Dövlət Layihə İnstitutunun əməkdaşı Hürrəm Xanmirzəyevin çərşənbə axşamı hadisə yerinə baxış zamanı jurnalistlərə verdiyi açıqlamaya görə, binada yaşamaq mümkün deyil. İnstitut binanın texniki sənədlərini alıb, onun əsasında yeni binanın tikintisi üçün layihə işlərini hazırlayacaq.
Lənkəran şəhər icra başçısının müavinin İlham Hüseynovun dediyinə görə, binadan köçürülən sakinlərə hər ay müvəqqəti yaşamaq üçün kirayə haqları ödənilir və həmin binanın əvəzinə 200 metr aralıqda olan 0,4 hektar boş ərazidə yeni binanın tikilməsi nəzərdə tutulub. Layihə-smeta sənədləri tamamlanmaq üzrədir, yaxın günlərdə binanın tikilməsinə başlanılacaq. Binanın hansı müddətə tikilib başa çatdırılacağına yaxın günlərdə aydınlıq gətirələcəyi bildirilir.
Lənkəran paytaxt Bakıdan 268 kilometr cənubda yerləşir. Əhalisi 201 min 500 nəfərdir. Əhalinin ümumi sayının 51,2 %-ni qadınlar, 48,8 %-ni kişilər təşkil edir.
