Azərbaycan, Bakı / Trend müxbir İ.Əlizadə/ Azərbaycanın Cinayət Məcəlləsində dəyişiklik edilməsini nəzərdə tutan layihə üzərində iş başa çatıb. Bu barədə Milli Məclisin Hüquq siyasəti və dövlət quruculuğu məsələləri daimi komissiyasının sədri, Məhkəmə-Hüquq Şurasının üzvü Əli Hüseynov məlumat verib.
O qeyd edib ki, dəyişiklik əsasən mövcud olan boşluq və ziddiyyətlərin aradan qaldırılmasını və Azərbaycanın cinayət qanunvericiliyinin Avropa Konvensiyasına uyğunlaşdırılmasını nəzərdə tutur: "Yəqin ki, Milli Məclisin payız sessiyasında bu məsələni müzakirə edəcəyik".
Azərbaycanda bir sıra cinayətlərə görə cəzanın yüngülləşdirilməsi məsələsinin müzakirə olunduğunu bildirən Hüseynov deyib ki, bu maddələrdən biri böhtan və təhqirə görə cinayət məsuliyyəti nəzərdə tutan 147 və 148-ci maddələrdir.
"Bir sıra cinayətlərə görə cəzaların yumşaldılması məsələsi müzakirə predmetidir. Hesab edirəm ki, hər hansı cinayətə görə cəzaların ağır olması həmin cinayətin qarşısını alan əsas amil deyil", -komissiya sədri əlavə edib.
