Azərbaycan, Bakı / Trend müxbir İ.Əlizadə/ NATO Parlament Assambleyasının 2008-ci ildə ilk Rouz-Rout seminarı Azərbaycanda keçirilə bilər. Bu barədə cümə axşamı Bakıda millət vəkili Məlahət Həsənova məlumat verib.
Deputat qeyd edib ki, iyunun 23-dən 27-dək Xorvatiyanın Dubrovnik şəhərində NATO Parlament Assambleyasının 66-cı Rouz-Rout seminarı keçirilib.
Üç gün davam edən seminarda əsasən Balkanlarda sərhəd və enerji təhlükəsizliyi məsələləri müzakirə olunub, Albaniya, Xorvatiya və Makedoniyanın NATO-ya inteqrasiyasına baxılıb. Eyni zamanda, Kosovonun statusu ilə əlaqədar fikir mübadiləsi aparılıb.
"Tədbirdə enerji təhlükəsizliyi məsələsi də geniş müzakirə olundu. Biz bildirdik ki, Azərbaycan Avropanın və dünyanın enerji təhlükəsizliyinin təmin olunması məsələsində böyük rol oynayır. Təklif etdik ki, 2008-ci ildə NATO-nun Rouz-Rout seminarı Azərbaycanda keçirilsin və tədbirdə enerji təhlükəsizliyi məsələsi müzakirə olunsun", -deyə Həsənova əlavə edib.
Onun sözlərinə görə, NATO və qurumun Parlament Assambleyasının rəhbərliyi Rouz-Rout seminarının Azərbaycanda keçirilməsi ideyasına müsbət yanaşıblar: "NATO rəhbərliyi seminarın Azərbaycanda keçirilməsində maraqlıdır. Tədbirin dəqiq tarixi Azərbaycan tərəfi ilə aparılan müzakirələrdən sonra məlum olacaq".
Həsənova onu qeyd edib ki, NATO-nun 67-ci Rouz-Rout seminarı oktyabrda Serbiyanın paytaxtı Belqradda keçiriləcək.
Xorvatiyada keçirilən seminarda Azərbaycanı deputatlar Siyavuş Novruzov və Məlahət Həsənova təmsil ediblər.
