...

Aclıq aksiyası keçirən jurnalistlərin sayı artır

Cəmiyyət Materials 29 Mart 2008 14:26 (UTC +04:00)

Azərbaycan, Bakı, 29 mart/ Trend , müxbir İ.Əlizadə/ Azərbaycanda mətbuata təzyiqlərə və media nümayəndələrinin həbsinə etiraz olaraq keçirilən aclıq aksiyasına daha bir jurnalist qoşulacaq. "Bu gün "Bizim yol" qəzetinin əməkdaşı Natiq Cavadlı da aclıq aksiyasına başlayacaq" - deyə şənbə günü Trend a açıqlamasında "Gündəlik Azərbaycan" qəzetinin şef-redaktoru Şahvələd Çobanoğlu bildirib.

"Gündəlik Azərbaycan" və "Realnıy Azerbaydjan"qəzetlərinin baş redaktoru Eynulla Fətullayevə dəstək məqsədilə "Yeni Müsavat" qəzetinin redaksiyasında "Gündəlik Azərbaycan" qəzetinin şef-redaktoru Şahvələd Çobanoğlu, "Yeni Müsavat" qəzetinin redaktoru Zahid Səfəroğlu və qəzetin əməkdaşı Elşən Balaxanlı üç gündür ki, açılıq aksiya keçirirlər.

12 saylı Cəzaçəkmə Müəssisəsində saxlanılan Fətullayev martın 26-dan həbsdə aclığa başlayıb. Baş redaktor işinə ədalətli və qərəzsiz baxılmasını, həbsdə olan həmkarlarının azadlığa çıxmasını tələb edir, Avropa Şurası və ATƏT-in siyasi məhbus məsələsində konkret müdafiə mexanizmləri ortaya qoymasını istəyir.

Çobanoğlu qeyd edib ki, aclıq aksiyasına qoşulmaq istəyən jurnalistlər çoxdur. Lakin qəzetlərin fəaliyyətinə mane yaratmamaq və aksiyanın davamlılığını təmin etmək üçün jurnalistlər növbə ilə açlığa qoşulacaqlar.

Onun sözlərinə görə, etiraz aksiyası keçirən jurnalistlərin vəziyyəti normaldır: "Adətən aclığın ikinci gün baş ağrıları olur. Dünən baş ağrıları var idi, bu gün o da keçib. Özümüzü normal hiss edirik".

Çobanoğlunun sözlərinə görə, bu gün onların səhhətinə nəzarət etmək üçün həkim komissiyası fəaliyyətə başlayacaq.

"Aclıq aksiyasının keçirilməsində məqsəd Eynulla Fətullayevə dəstək verməkdir. Əgər onun tələbləri heç olmasa qismən yerinə yetirilsə, beynəlxalq təşkilatlar Fətullayevin irəli sürdüyü tələblərə reaksiya versə, siyasi məhbusların azadlığa buraxılması ilə bağlı mexanizmləri açıqlasalar, ya da bunu həyata keçirə bilmədiklərini etraf etsələr açlıq aksiyasını dayandırarıq" - deyə Çobanoğlu əlavə edib.

O qeyd edib ki, Fətullayevin başladığı aclıq aksiyasına bir qrup məhbus da qoşulub. Bunlar Milli Qəhrəman Rasim Əkbərov, "Yeni Fikir" Gənclər Təşkilatının sədri Ruslan Bəşirli, keçmiş polis zabiti Müşfiq Mədətovdur. Aprelin 5-də isə bütün siyasi məhbusların aclıq aksiyasına başlayacağı gözlənilir.

Eyni zamanda, aksiyaya dəstək məqsədilə Avropadakı azərbaycanlı siyasi mühacirlər də aclıq aksiyasına başlayıblar.

Fətullayev Cinayət Məcələsinin terororçuluqla hədələmə (214.1-ci), qulluq möveyindən istifadə etməklə milli, irqi, sosial və ya dini düşmənçiliyin salınması (283.2.2-ci) və vergidən yayınma(213.2.2) maddələri ilə təqsirli bilinərək, məhkəmənin hökmü ilə 8 il 6 ay azadlıqdan məhrum edilib.

Azərbaycanda peşə fəaliyyəti ilə bağlı 3 jurnalist - "Azadlıq" qəzetinin baş redaktoru Qənimət Zahid və onun qardaşı, qəzetin əməkdaşı Mirzə Sakit həbsdədir.

Xəbər lenti

Xəbər lenti