Azərbaycan, Bakı, 14 aprel / Trend , müxbir K.Zərbəliyeva/ Erməni əsirliyində olan Azərbaycan əsgərinin yaxın vaxtlarda vətənə qayıtması gözlənilir. Əsir və itgin düşmüş, girov götürülmüş vətəndaşlarla əlaqədar Dövlət Komissiyasının katibi Şain Sayılov bazar ertəsi Trend a açıqlamasında bildirib ki, əsirin qaytarılması istiqamətində komissiya müvafiq tədbirlər həyata keçirir. Komissiyanın katibi güman edir ki, əsirlikdə olan Yaqub Muxtarovun vətənə qaytarılması yaxın günlərdə baş tutacaq.
Bir müddət öncə üçüncü ölkəyə keçirildiyi bəyan edilən, erməni əsirliyində olan Azərbaycan əsgərinin Avropa ölkələrinin birində olduğunu deyən Sayılov bildirib ki, əsir Samir Məmmədovun vətənə qayıtmaqdan imtina etməsi barədə Ermənistan mətbuatının yaydığı məlumatlar əsassızdır. Onun sözlərinə görə, Məmmədovun əsir götürüləndən üç ay sonra üçüncü ölkəyə getməsi barədə məlumatların yayılması onu deməyə əsas verir ki, o, bu qərarı ona qarşı olan təzyiqlər əsasında qəbul edib. "Əgər Azərbaycanda əsirlikdə olan erməni öz ölkəsinə qayıtmaqdan imtina edərsə, biz bu barədə dərhal bütün dünya ictimaiyyətinə və KİV-ə məlumat veririk. Məmmədova qarşı üç ay ərzində təbii ki, psixoloji təzyiqlər göstərilib və o, təzyiqlərə məruz qaldığı üçün vətən qayıtmaqdan imtina edib. Əgər o, öz istəyi ilə üçüncü ölkəyə getsəydi, bu barədə dərhal məlumat verilərdi" - deyə komissiya sədri bildirib.
Məmmədov 2005-ci ilin dekabrında qulluq etdiyi hərbi hissənin yaxınlığında əsir götürülüb. Bu il isə o, üçüncü ölkəyə təhvil verilib.
Məqalə müəllifi ilə əlaqə ünvanı: [email protected]
