Azərbaycan, Bakı, 01 may / Trend , müxbir R.Ergün/ Azərbaycan Futbol Federasiyaları Assosiasiyası (AFFA) futbol hakimlərinin təcrübəsini və biliyini artırmaq məqsədi ilə Bakıya məşhur referiləri dəvət etməyi planlaşdırır. "Azərbaycan Premyer-Liqasında oyunlar başa çatandan sonra Bakıya məşhur hakimləri dəvət edəcəyik. Belə hakimlərdən biri FİFA və UEFA strukturlarında böyük iş təcrübəsi olan Aleksey Nikolayeviç Pirindir. Pirin hakimlərin təlim-məşq toplanışında iştirak edib onlara öz tövsiyələrini verəcək", cümə axşamı Trend a AFFA Hakimlər Komitəsinin (HK) sədri Xaqani Məmmədov deyib.
Pirin əvvəllər FİFA hakimi kimi bir sıra beynəlxalq dərəcəli oyunları idarə edib. AFFA rəhbərliyi rusiyalı referini Bakıya avqustun əvvəllərində dəvət etmək istəyir.
HK sədri son günlər Azərbaycan kubokunun finalını Almaniyadan olan hakimlərin idarə edəcəyi ilə bağlı deyilənlərə də münasibətini bildirib. "Kubokun final oyununu Almaniyadan olan hakimlərin idarə edəcəyi ilə bağlı deyilənlərdən xəbərim var. Amma bu heç də tam dəqiqləşməyib. HK sədri kimi mən heç kimə kubokun finalını hansı hakimin idarə edəcəyini deməmişəm" - deyə Məmmədov əlavə edib.
Məmmədov HK-nın sədri vəzifəsində bu ilin aprel ayının əvvəllində Murad Məmmədovu əvəzləyib. O, 1998-2001-ci illər aralığında da Hakimlər Komitəsinə rəhbərlik edib.
Məqalə müəllifi ilə əlaqə ünvanı: [email protected]