Azərbaycan, Bakı, 29 may/ Trend , müxbir İ.Əlizadə/ Beynəlxalq Qırmızı Xaç Komitəsi (BQXK) hesab edir ki, silahlı münaqişələrlə üzləşən milyonlarla insan ərzaq qiymətlərinin artımından xüsusilə əziyyət çəkəcək. "Ərzaq və yanacaq qiymətlərinin hazırkı artımı müharibə və daxili zorakılığın təsirləri ilə çarpışan kasıb adamların həyatını daha da çətinləşdirəcək. Bu, xüsusilə Çad, Somali, Yəmən, Əfqanıstan və Haiti kimi ölkələrə aiddir", - deyə bazar ertəsi Cenevrədə təşiklatın 2007-ci il üzrə illik hesabatını təqdim edərkən BQXK-nın prezidenti Yakob Kellenberqer bildirib.
Baş qərargahı Cenevrədə yerləşən təşkilat özünün 2007-ci il hesabatında ümumi xərclərin 944 milyon İsveçrə frankına bərabər olduğunu elan edir, keçən il yerlərdə nümayəndəliklərə verilən maliyyənin 45%-i Afrikaya, 21%-i isə Yaxın Şərqə sərf olunub. BQXK 14 milyon insanın bəhrələndiyi su, sanitariya və tikinti-quraşdırma layihələri həyata keçirib, səhiyyə müəssisələri üçün müntəzəm dəstəyi təmin edib ki, bu dəstəyin sayəsində keçən il 2,9 milyona yaxın xəstə müalicə olunub. Bu təşkilat 77 ölkədə yarım milyondan çox saxlanılan şəxsə baş çəkib.
Kellenberqer əlavə edib ki, qiymətlərin qalxmasına baxmayaraq, BQXK mülki əhaliyə kömək etdiyi 52 ölkədə yardım paylanmasını, içməli su təchizatı və tibbi yardımı planlaşdırdığı səviyyədə saxlamaq niyyətindədir. O, həmçinin öz evlərindən didərgin düşmüş insanlar, xəstə və yaralılar, habelə saxlanılan şəxslər daxil olmaqla, həm qiymətlərin artımı, həm də silahlı münaqişənin təsirlərinə daha çox məruz qalmış əhaliyə əlavə ərzaq və digər yardım təmin etməyi planlaşdırır.
Kellenberqer silahlı münaqişələrin çoxunda xüsusilə mülki əhalinin hədəfə çevrilməsindən, nəticədə milyonlarla kişi, qadın və uşağın həyatının məhvə məruz qalmasından narahatlığını ifadə edib: "Bu hesabat keçən il dünyada şahid olduğumuz beynəlxalq humanitar hüququn saysız-hesabsız pozuntularına diqqəti cəlb edir və BQXK-nın bu qanun pozuntularına son qoymaq üzrə səylərini sənədləşdirir. Hüquqa daha hörmətlə yanaşılması daha az mülki şəxsin öldürülməsi və ya yaralanması, daha az qadın və qızların zorlanması, daha az əhalinin evlərindən didərgin düşməsi demək olardı".
Məqalə müəllifi ilə əlaqə ünvanı: [email protected]
