Azərbaycan, Bakı, 29 avqust / Trend , müxbir E. Babayev/ Azərbaycanda Elan və Reklam Şurası yaradıla bilər. Cümə günü Trend -a Mətbuat Şurasından verilən məlumata görə, bu məsələ hazırda Türkiyədə səfərdə olan qurumun İdarə Heyətinin keçirdiyi görüşlərdə müzakirə mövzusu olub.
Avqustun 26-da Mətbuat Şurasının İdarə Heyətinin bir qrup üzvü Türkiyəyə beşgünlük səfər edib.
Cümə günü Azərbaycanın media təmsilçilərinin keçirdiyi görüşlərdə mətbuatımızın reklam bazarının inkişafı diqqət mərkəzində olub.
Media Elanlar Şurasının (MEŞ) Baş direktorunun müavini Behzat Erdoğan Mətbuat Şurasının təmsilçilərinə bildirib ki, qurum 1961-ci ildə gündəlik qəzetlərə ictimai-siyasi statusundan və orientasiyasından asılı olmayraq, maddi dəstək məqsədilə yaradılıb. Şura Türkiyənin xüsusi qanunu ilə təsdiq olunub. Elan və reklamın paylanmasında obyektivlik və şəffaflığı MEŞ İdarə Heyəti təmin edir. O vurğulayıb ki, İdarə Heyətinə müxtəlif nəşriyyatların jurnalistləri, elmi dairələrdən və hökumətdən hər birindən 12 nümayəndə daxildir. MEŞ haqqında Qanuna əsasən, bütün dövlət qurumları mətbuatda elan və reklamı yalnız bu qurum vasitəsilə yerləşdirməlidirlər.Erdoğan elan-reklam yerləşdirilməsinin həcminin pulla ifadə olunmasının qanunla təsdiq edilmiş xüsusi metodlar üzrə həyata keçirildiyini bildirib. Bu zaman qəzetlərin satış həcmi (formal tiraj yox), həmçinin, qəzetin yayım arealı (ölkə üzrə və ya ayrıca regionda) nəzərə alınır. Amma qəzetin tirajının gündə 5 mindən, əməkdaşların sayının isə 12 nəfərdən az olmaması mütləq tələbdir. Onun sözlərinə görə, hazırda Türkiyədə 30 ümummilli qəzet və çox sayda yerli gündəlik qəzetlər belə dəstəkdən yararlanır. Müzakirələr zamanı Erdoğan Türkiyə təcrübəsinin Azərbaycan mühitinə tamamilə tətbiqinin mümkünsüzlüyünü deyib. O fikrini onunla izah edib ki, hər bir ölkədə spesifik cəhətlər var və onlar mütləq nəzərə alınmalıdır. Bununla belə o, MEŞ-in Azərbaycanda Elan və Reklam Şurasının yaradılmasına yardım göstərməyə hazır olduğunu vurğulayıb.