Azərbaycan, Bakı 05 noyabr / Trend müxbir K.Zərbalıyeva/ Azyaşlı oğlunu əcnəbilərə 10 min dollara satmaq istəyən Azərbaycan vətəndaşına məhkəmə hökm oxuyub.
Andrey Ağayevə məhkəmənin hökmü ilə 11 il azadlıqdan məhrumetmə cəzası verilib.
Trend -un məlumatına görə, Ağır Cinayətlərə Dair İşlər üzrə Məhkəmədə hakim Əmir Bayramovun sədrliyi ilə Andrey Ağayevin işi üzrə keçirilən məhkəmə prosesi çərşənbə günü başa çatıb.
Bu ilin martında Bakı Şəhər Baş Polis İdarəsinin əməkdaşları Bakı şəhər sakini Andrey Ağayevi, 5 yaşlı oğlunu xarici ölkə vətəndaşına satarkən saxlayıb.
Uşağı almaq istəyən əcnəbilər Ağayevin evində ona 10 min dollar verib, oğlu Nikolay Osyamini özləri ilə apararkən polislər tərəfindən tutulublar.
İlkin dindirmə zamanı Ağayev oğlunu maddi imkansızlıq üzündən satdığını etiraf edib.
Ağayevə qarşı Cinayət Məcəlləsinin insan alveri (144-1.3) maddəsi ilə cinayət işi açılıb.
Müəlliflə əlaqə saxlamaq üçün elektron ünvan- [email protected]
