...

Legioner futbolçular: Azərbaycan futbolunu uğura aparan qısa yol –TrendNews - un icmalçısı

Cəmiyyət Materials 9 Yanvar 2009 16:49 (UTC +04:00)

Rəşad Ergün, TrendNews - un idman icmalçısı

Bir ölkənin futbol üzrə yığma komandasının güclü olması üçün həmin ölkənin çempionatının yüksək səviyyədə təşkil olunması əsas şərtdir. Amma bundan heç də az əhəmiyyət daşımayan başqa bir şərt də var: ölkənin yığma komandasını güclü görmək istəyirsənsə, legioner futbolçuların sayı çox olmalıdır.

Yaxınlarda Beynəlxalq Futbol Tarixi və Statistikaları Federasiyası (BFTSF) dünyanın 100 ən güclü futbol çempionatlarının siyahısını açıqlayıb. Çox təəssüf  ki, Azərbaycan Premyer-Liqası bu siyahının hətta conuncu onluğuna düşməyib. Deməli, yığma komandanın ölkə çempionatının səviyyəsinə görə güclənməsi ilə bağlı əsas şərt özünü doğrultmur.  Ümid qalır ikinci şərtə.

Azərbaycanın xaricdə çıxış edən futbolçuları ilə bağlı məsələ də qibtəolunacaq səviyyədə deyil. Hazırda yığma komandanın üç üzvü - Anatoli Ponomaryov, Branimir Subaşiç və İlqar Qurbanov ölkədən kənarda, legioner kimi çıxış edir. Milli komandanın kapitanı Rəşad Sadıqov Türkiyə Superliqasında çıxış edən "Kocaelispor"la müqavilə bağlamaq ərəfəsindədir.

Hazırda dünya futbolunun simasını futbolçu mübadilələrinin, legionerlərin müəyyənləşdirdiyini nəzərə alsaq, Azarbaycan üçün ölkə xaricində üç oyunçunun olması çox kiçik rəqəmdir. Azərbaycanlı legionerlərin çıxış etdikləri klublarda aparıcı oyunçular olmadıqlarını da buraya əlavə etsək, vəziyyətin heç də yaxşı olmadığını qəbul etmək lazım gəlir.

Amma bu gün Azərbaycan futbolunda maraqlı bir tendensiya müşahidə olunur. Yığma komandanın üzvü olmayan, son illər aparıcı oyunçu statusunu itirən xeyli oyunçu Türkiyənin birinci liqa klubları ilə müqavilə bağlamağa can atır; hazırda üç futbolçu - Cahangir Həsənzadə, Fərrux İsmayılov və Ramal Hüseynov Türkiyə klublarında baxışdadır.

Yığma komandanın üzvü olan futbolçular Azərbaycandan kənara çıxmadıqları halda, yaşa dolmuş, əvvəlki gücü ilə oynaya bilməyən oyunçuların xaricə getməsində təəccüblü heç nə yoxdur. Məsələ burasındadır ki, Azərbaycan Premyer-Liqasında legioner limiti ləğv olunandan sonra, yerli futbolçulara tələbat azalıb. Belə vəziyyətdə yalnız daha gənc, daha güclü olan azərbaycanlı futbolcular müxtəlif ölkələrdən dəvət olunan legionerlərlə rəqabətə apara bilir. Daha yaşlı, ideal formadan çox uzaq olanlar isə, çıxış yolunu xaricə getməkdə görür. Yəni nə qədər təəccüblü də olsa, Azərbaycan futbolu ehtiyac duymadığı oyunçuları ölkə xaricinə "ixrac etməyə" başlayıb. Bu məqam, yığma komanda - legioner futbolçu müstəvisində xoşa gələn yeganə məqamdır.

Azərbaycan yığma komandasını qarşıda dünya çempionatının seçmə mərhələsi çərçivəsində bir-birindən çətin oyunlar gözləyir. Dünyanın müxtəlif ölkələrində legioner futbolçuları olan Almaniya, Rusiya, Finlandiya, Uels kimi milli komandalarla görüşlərdə uğur qazanmaq üçün Azərbaycanın da legioner futbolçulara ehtiyacı var. Əks halda, beş, on, on beş il əvvəl olduğu kimi, məğlubiyyətlər qaçılmaz olacaq. Artıq 10-15 il əvvəlki dövr deyil və Azərbaycan futbolu da Avropa futbolu ilə ayaqlaşmalıdır - futbolun bütün komponentlərində.

Məqalə müəllifi ilə əlaqə ünvanı: [email protected]          

Xəbər lenti

Xəbər lenti