Azərbaycan, Bakı, 03 fevral/ Trend , müxbir A.Hüseynbala/ Azərbaycan deputatları Milli Ordunun cəbhəyanı hərbi hissədəki vəziyyətindən razı qalıblar.
"Biz Azərbaycan ordusunun döyüş qabiliyyətinin kifayət qədər yüksək olduğunun bir daha şahidi olduq", - çərşənbə axşamı Trend Xəbərlər Şirkətində keçirilən mətbuat konfransında Milli Məclisin deputatı Həvva Məmmədova bildirib.
Parlamentin bir qrup deputatı Milli Ordununu Xocavənd rayonunda yerləşən hərbi hissəsində olub.
Onun sözlərinə görə, cəbhə bölgəsində yerləşən N saylı hərbi hissədə ciddi nizam-intizamın da şahidi olublar. "Səngərlərimizdə keşik çəkən əcgərlərimimzin əhval-ruhiyyəsi də kifayət qədər yüksəkdir", - Məmmədova əlavə edib.
"Bu gün ordumuzun keyfiyyətli ərzaqla təchiz olunduğunu danmaq olmaz", - deputat, ehtiyatda olan polkovnik Aydın Həsənov deyib.
Onun fikrincə, Azərbaycan ordusundakı islahatlardan yazmaq üçün mütləq hərbi hissələrə gedib bunun şahidi olmaq lazımdır. "Biz həmin hərbi hissədə müharibə dövründə nizam-intizamın şahidi olduq", - deputat vurğulayıb.
"Valideynlər bu gün hərbi xidmət keçən övladlarının taleyindən narahat olmasınlar", - Milli Məclisin üzvü Baba Tağıyev bildirib.
Onun sözlərinə görə, parlament orduya nəzarəti getdikcə daha da gücləndirəcək. "Biz bir daha ordumuzun maddi-texniki təchizatının yüksək olduğunu gördük", - Tağıyev deyib.
Məqalə müəllifi ilə əlaqə ünvanı: [email protected]
