Azərbaycan, Bakı, 21 may / Trend , müxbir K.Zərbalıyeva /
Azərbaycanlı dini ekspert hesab edir ki, "Dini etiqad azadlığı haqqında" Qanuna edilən son əlavə və dəyişikliklər insan hüquqlarını məhdudlaşdırır.
Trend -un məlumatına görə, Media Mərkəzində "Dini etiqad azadlığı haqqında" Qanuna edilən son dəyişikliklər vicdan azadlığını məhdudlaşdırırmı?" mövzusunda keçirilən debatda çıxış edən Dini Etiqad və Vicdan Azadlığı Mərkəzinin rəhbəri İlqar İbrahimoğlu bildirib ki, sözügedən qanuna 1992-ci ildən bu günədək edilən dəyişikliklər dini icmaların qeydiyyat prosesində bürokratik əngəllər yaradır.
"Bu gün dini icmalar qeyri-hökumət təşkilatı statusunu itirir. 1992-ci ilədək dini icmaların qeydiyyatını Ədliyyə Nazirliyi aparırdı. Bu səlahiyyətlərin Dini Qurumlarla İş üzrə Dövlət Komitəsinə verilməsi problemlər yaradıb. Qeyri-müsəlman icmalarının qeydiyyatı ilə bağlı problem olmasa da, müsəlman dini icmalarının qeydiyyata alınmasında problemlər var. Müsəlman dini icmalarını qeydiyyata almaq üçün Qafqaz Müsəlmanları İdarəsindən təqdimat alınmalıdır", - İbrahimoğlu deyib.
Debatın digər iştirakçısı Dini Qurumlarla İş üzrə Dövlət Komitəsinin şöbə müdiri Gündüz İsmayılov isə İbrahimoğlunun fikirləri ilə razılaşmayıb.
Şöbə müdiri bildirib ki, qanuna edilən son əlavə və dəyişikliklər insan hüquqlarını məhdudlaşdırmır.
O, dini icmaların qeydiyyatı ilə bağlı problemlər olması fikri ilə razılaşmayıb və qeyd edib ki, müsəlman və qeyri-müsəlman dini icmalarına bərabər şərait yaradılıb.
"Yalnız müsəlman dini icmaları şəri məsələlərdə (axund və imamların təyinatı) Qafqaz Müsəlmanları İdarəsinə tabedir və ona görə də bu idarənin təqdimatı lazımdır. Dinlə bağlı məsələlərdə dövlət milli dəyərlər, vicdan azadlığı ilə yanaşı, cəmiyyətin və dövlətin təhlükəsizlik məsələlərinə önəm verir", - komitə rəsmisi bildirib.
İbrahimoğlu Azərbaycanda dini ədəbiyyata senzura qoyulmasından da narahatlığını bildirib.
O qeyd edib ki, hansısa dini ədəbiyyatın ölkəyə gətirilməsinə yalnız məhkəmə yolu ilə qadağa qoyula bilər.
İsmayılov isə qeyd edib ki, ölkədə dini dözümlülüyə və tolerantlığa ziyan verə biləcək dini ədəbiyyata komitə tərəfindən qadağa qoyulub.
"Ötən il komitə 1503 adda dini kitaba rəy verib, 30-dan çox kitab rəydən keçməyib. Mənfi rəylərlə bağlı komitəyə heç bir şikayət daxil olmayıb və məhkəmədə mübahisə olunmayıb", - İsmayılov bildirib.
Məqalə müəllifi ilə əlaqə ünvanı:[email protected]
