Azərbaycan, Bakı, 06 iyul / Trend , müxbir H.Bağırov /
Azərbaycanda terrorçuluqda və silahlı birləşmələr yaratmaqda təqsirləndirilən "Meşə qardaşları" silahlı birləşməsi üzvlərinin məhkəmə prosesi başlayıb.
Ağır Cinaytələrə Dair İşlər üzrə Məhkəmədə bazar ertəsi keçirilən məhkəmə prosesində təqsirləndirilənlər və onların vəkilləri vəsatətlə çıxış ediblər.
Təqsirləndirilən Teymur Nərimanov məhkəmə prosesində vəkildən imtina etməsi barədə vəsatət verib.
Prosesə sədrlik edən hakim istintaq zamanı Nərimanovun psixikasında problemlərin müəyyən olunduğunu əsas gətirərək vəsatəti təmin etməyib.
Təqsirləndirilən Xalid Vəlimətov ibtidai istintaq zamanı hüquqlarını müdafiə etdiyi vəkilə xidməti müqabilində verdiyi pulun geri qaytarılması, Zabit Şıxbalayevin vəkili Elman Osmanov müdafiə etdiyi şəxs barəsindəki cinayət işinin 228.3 və 234.3-cü maddələr üzrə hissəsinə xitam verilməsi, əlavə şahidlərin cağırılması, Musa Orucov həbs olunarkən üstündən götürülmüş 1200 rubl məbləğində pulun geri qaytarılması barədə vəsatətlər versələr də, məhkəmə onları baxılmamış saxlayıb.
Proses günün ikinci yarısında prokurorun ittiham aktını elan etməsi ilə davam etdiriləcək.
26 nəfərdən ibarət dəstə üzvlərinə Cinayət Məcəlləsinin 279-cu (qanunvericilikdə nəzərdə tutulmayan silahlı birləşmə yaratmaq), 214-cü (terroçuluq), 120-ci (qəsdən adam öldürmə), 228-ci (qanunsuz silah saxlama, hazırlama), dövlət sərhədini qanunsuz keçmə, 315-ci (hakimiyyət nümayəndələrinə qarşı müqavimət göstərmə), 320-ci (rəsmi sənədləri, dövlət möhürlərini saxtalaşdırma) və digər maddələrlə ittiham irəli sürülüb.
2007-ci ildə MTN tərəfindən Sumqayıtda qrupun 17 nəfər üzvü ("Əbu Cəfər"in qrupu), o cümlədən qrupun liderlərindən biri - Naif Abdulkərim Əl-Bədəvi həbs edilib. MTN tərəfindən keçirilmiş kompleks əməliyyat-axtarış tədbirləri nəticəsində 2008-ci il avqustun 17-də "Əbu-Bəkr" məscidində partlayış törədilməsində əslən Zaqatala rayonundan olan "Əbdül Məcid" ləqəbli İlqar Mollaçiyev, onun qaynı "Süleyman" ləqəbli Samir Mehdiyev və onlarla cinayət əlaqəsində olan radikal dini təmayüllü digər şəxslərin əli olduğu müəyyən edilib. Sumqayıt qrupunun üzvlərinin həbsindən sonra Mollaçiyev və Mehdiyev yeni qrup formalaşdırmağı və Azərbaycanda ictimai-siyasi sabitliyin pozulmasına yönəlmiş terrorçuluq əməlləri törətməyi planlaşdırıblar.
MTN-in keçirdiyi əməliyat nəticəsində 13 nəfər qrup üzvü həbs edilib.
Hazırlanmış plana əsasən, "Meşə qardaşları" silahlı birləşməsinə daxil olan "Sumqayıt camaatı" adlı I qrupun üzvləri Bakıda qarətlər törətməli, əldə edilən pul vəsaiti hesabına silah-sursat tədarükü görməli, terrorçuluq hərəkətləri həyata keçirməli, "Quba və Qusar camaatı" adlı II qrupun üzvləri isə respublikanın dağ-meşə massivində hərbi düşərgələr yaratmalı idilər.
