Azərbaycan, Bakı, 18 may /Trend, müxbir H.Bağırov/
Azərbaycanda qəsdən adam öldürməyə cəhddə təqsirli bilinən hərbi qulluqçunun məhkəməsi başlayıb.
Trend-in məlumatına görə, bu gün Ağır Cinayətlərə Dair İşlər üzrə Məhkəmədə Müdafiə Nazirliyinin "N" saylı hərbi hissəsinin əsgəri Məhəmməd Amoyevin cinayət işi üzrə keçirilən prosesdə prokuror ittiham aktını elan edib.
Təqsirləndirilən şəxs elan olunmuş ittiham üzrə özünü təqsirli bilib. O, ifadəsində qeyd edib ki, zərərçəkmiş əsgər yoldaşı Samir Mollayevlə zarafat edib. Onun sözlərinə görə, Mollayevin ayağının altına atəş açıb.
Zərərçəkmiş qismində ifadə verən Mollayev də hadisənin aralarında yaranan zarafat nəticəsində baş verdiyini deyib.
Təsqirləndirilən şəxs Cinayət Məcəlləsinin xüsusi amansızlıqla və ya təhlükəli üsulla qəsdən adam öldürməyə cəhd (29,120.2.4) maddəsi ilə ittiham edilir.
Amoyev xidmət etdiyi Müdafiə Nazirliyinin Qusar rayonunda yerləşən "N" saylı hərbi hissəsində xidmət edərkən avtomat silahdan əsgər yoldaşı Samir Mollayevi öldürmək məqsədilə atəş açıb. Açılan atəş Mollayevə dəyməyib, Amoyev isə həbs edilib.
