Azərbaycan, Bakı, 31 oktyabr / Trend müxbir M.Əliyev/
"Azneft" İstehsalat Birliyinin "28 May" Neft və Qazçıxarma İdarəsi tərəfindən istismar olunan "Günəşli" yatağında yerləşən 3 saylı dərin dəniz özülündəki 125 saylı quyuda əsaslı təmir işləri zamanı bədbəxt hadisə baş verib. Trend-in məlumatına görə, bu barədə Azərbaycan Respublikasının Dövlət Neft Şirkətinin (ARDNŞ) rəsmi saytında bildirilir.
NQÇİ-nin qazmaçısı Gözəlov Nəhmət Absalam oğlu və qazmaçı köməkçisi Qazıyev Fikrət Əziz oğlu hadisə zamanı aldıqları xəsarətdən dünyasını dəyişiblər.
"Əsaslı təmir işləri NQÇİ-nin əməkçiləri tərəfindən aparılan gündəlik istehsalat proseslərindəndir və bu proseslər zamanı riayət olunmalı əməyin mühafizəsi qaydaları işçilərə yaxşı məlumdur", - ARDNŞ-nin məlumatında bildirilir.
İlkin araşdırmalar göstərib ki, əsaslı təmir işləri zamanı bütün işçilər, o cümlədən Gözəlov və Qazıyev lazımi fərdi mühafizə vasitələrindən istifadə ediblər.
Hadisə ilə əlaqədar Dövlət Əmək Müfəttişliyi, Azərbaycan Neft və Qaz Sənayesi İşçiləri Həmkarlar İttifaqı Respublika Komitəsi və ARDNŞ-nin müvafiq qurumlarının nümayəndələrindən ibarət birgə komissiya yaradılıb.
Hadisənin səbəbləri araşdırılır.