Azərbaycan, Bakı, 11 yanvar /Trend müxbir H.Vəliyev/
IREX beynəlxalq qeyri-kommersiya təşkilatı Azərbaycanın ali məktəblərində pulsuz Wi-Fi nöqtələrini genişləndirir. Bu barədə çərşənbə günü Trend-ə IREX təşkilatının hüquqşünası Ələsgər Məmmədli deyib.
Məmmədlinin sözlərinə görə, yaxın müddətdə pulsuz Wi-Fi nöqtəsi Sumqayıt Dövlət Universitetində işə salınacaq.
"Azərbaycanın ali məktəblərində pulsuz Wi-Fi nöqtələrinin işə salınması üzrə layihə ötən il start götürüb. Hazırda pulsuz simsiz zonaya çıxış imkanı Bakı Dövlət Universiteti, Azərbaycan Tibb Universiteti və Azərbaycan Neft Akademiyasında işə salınıb. Wi-Fi zonaları daha geniş istifadəçi auditoriyası olan ali məktəblərdə işə salınır. Bu, əsasən universitet kampusları, kitabxanaları, kafeləri və digərləridir", - o bildirib.
Məmmədlinin sözlərinə görə, pulsuz internet çıxışı əvvəlcədən müəyyən edildiyi kimi əsasən, dövlət universitetlərində işə salınır. Perspektivdə pulsuz Wi-Fi zonalarının Gəncə və Lənkəran Dövlət universitetlərində işə salınması planlaşdırılır.
