Azərbaycan, Bakı, 13 aprel /Trend/
Rusiyanın Azərbaycanlı Gənclər Təşkilatının (RAGT), Avropa Azərbaycan Cəmiyyətinin, Azərbaycan-Britaniya Tələbə Şəbəkəsinin təşkilatçılığı və ölkəmizin Böyük Britaniyadakı səfirliyinin dəstəyi ilə Londonda azərbaycanlı tələbələr arasında intellektual olimpiada keçirilib.
Trend-ə verilən məlumata görə, "City" universitetində fəaliyyət göstərən Azərbaycan Cəmiyyətinin sədri Azər Əsgərov tədbirdə çıxış edərək yeni yaranmış Azərbaycan-Britaniya Tələbə Şəbəkəsi haqqında məlumat verib. Tələbələr arasında keçirilən olimpiadanın yalnız müsabiqə deyil, həm də sosial xarakter daşıdığını diqqətə çatdıran A.Əsgərov tədbirin azərbaycanlı tələbələrin bir araya gəlməsi və əlaqələndirilməsi üçün də əhəmiyyət kəsb etdiyini vurğulayıb. O, tədbirin təşkilatçılarına, xüsusilə Heydər Əliyev Fondunun vitse-prezidenti, RAGT-ın sədri Leyla Əliyevaya dəstəyə görə minnətdarlığını ifadə edib.
Daha sonra Azərbaycan Respublikası Prezidenti Administrasiyasının İctimai-siyasi məsələlər şöbəsinin əməkdaşı Natiq Əliyev çıxış edib. O, Britaniyanın azərbaycanlı gəncləri arasında intellektual oyunun keçirilməsində göstərdiyi dəstəyə görə RAGT-ın sədri Leyla Əliyevaya təşəkkür edib. Vurğulayıb ki, gənclər cəmiyyətin güclü diasporunun formalaşmasında mühüm rol oynayan çevik və dinamik hissəsidir. Azərbaycanda Prezident İlham Əliyevin qayğısı sayəsində gənclər siyasətinin həyata keçirilməsinə böyük diqqət yetirilir, gənc nəslin potensialını üzə çıxarmaq üçün hər cür şərait yaradılır.
Diqqətə çatdırılıb ki, tələbələrimiz arasında bu cür intellektual tədbirlərin həyata keçirilməsi sevindirici haldır. Gələcəyimiz olan gənclər dünyanın bütün ölkələrində ulu öndər Heydər Əliyevin azərbaycançılıq ideyası ətrafında sıx birləşməli və Azərbaycan naminə fəaliyyət göstərməlidirlər.
N.Əliyev tədbirin keçirilməsində əməyi olan təşkilatlara və Azərbaycanın Britaniyadakı səfirliyinə minnətdarlığını bildirib.
Britaniyada fəaliyyət göstərən azərbaycanlı hüquqşünas Kamran Balayev tədbirin cəmiyyətimizin inkişafının təzahürü olduğunu bildirib. Bu cür tədbirlərin davamlı keçirilməsinin əhəmiyyətini vurğulayan hüquqşünas təşkilatçılara minnətdarlığını ifadə edib.
Azərbaycan-Britaniya Tələbə Şəbəkəsinin idarə heyətinin üzvü Kamal Hüseynov Heydər Əliyev Fondunun vitse-prezidenti Leyla Əliyevanın dünyanın hər yerində gənclərimizə dəstək olduğunu bildirib. İntellektual oyunların tələbələrimizin sosial və zehni inkişafı baxımından əhəmiyyətini diqqətə çatdıran K.Hüseynov gələcəkdə də bu cür oyunların keçirilməsinin vacibliyini diqqətə çatdırıb, təşkilatçılara azərbaycanlı tələbələr adından təşəkkürünü bildirib.
Müsabiqədən sonra qaliblərin mükafatlandırılması mərasimində çıxış edən Azərbaycanın Böyük Britaniyadakı səfiri Tahir Tağızadə tədbirin əhəmiyyətindən danışıb. Səfir RAGT-ın sədri Leyla Əliyeva başda olmaqla olimpiadanın təşkilində əməyi olan hər kəsə təşəkkürünü bildirib. "Azərbaycan gəncləri bizim gələcəyimizdir. Sabahkı fəaliyyətimiz, həmrəyliyimiz bu gün təhsil alan, öz üzərində çalışan gənclərimizin olacaq", - deyə diplomat bildirib. İntellektual oyunların vacibliyini vurğulayan səfir Azərbaycanın gələcəyi üçün hazırlanmış bütün planların ağıl və idrak sayəsində olduğunu diqqətə çatdırıb. O deyib ki, intellektual oyunlar gənclərimizin və bütün insanların elmə, təhsilə olan həvəslərini artırır. Səfir komandalara işğal edilmiş rayonlarımızın adlarının verilməsini yüksək qiymətləndirib. "Azərbaycanın işğal altında olan torpaqları hər zaman bizim olub, gələcəkdə də bizim olacaq", - deyə səfir vurğulayıb.
Olimpiadada Britaniyanın müxtəlif universitetlərində təhsil alan azərbaycanlı tələbələr iştirak ediblər.
Sonda "Füzuli" komandası qalib olub. Komanda iştirakçılarına pul mükafatı və sertifikatlar verilib.
Sertifikatları Azərbaycanın Böyük Britaniyadakı səfiri Tahir Tağızadə təqdim edib.
...