...

Baş Prokurorluq korrupsiyaya qarşı mübarizə ilə bağlı beynəlxalq tədbirdə iştirak edib

Cəmiyyət Materials 24 Noyabr 2017 10:36
Baş Prokurorluğun əməkdaşı korrupsiyaya qarşı mübarizə mövzusunda keçirilmiş beynəlxalq təlim kursunda iştirak edib.
Baş Prokurorluq korrupsiyaya qarşı mübarizə ilə bağlı beynəlxalq tədbirdə iştirak edib

Trend-i buradan izləyin

Bakı. Trend:

Noyabr ayının 6-dan 17-dək Paris şəhərində Fransanın Milli İdarəçilik Məktəbi (ENA) tərəfindən “Korrupsiyaya qarşı mübarizə” mövzusunda təşkil olunmuş təlim kursu keçirilib.

Korrupsiyaya qarşı mübarizə sahəsində Fransa hökuməti tərəfindən əldə edilmiş təcrübənin və həmin sahədə qazanılmış son nailiyyətlərin iştirakçı dövlətlər arasında mübadiləsi məqsədi ilə təşkil olunmuş təlim kursunda dünyanın 22 ölkəsindən 38 nümayəndə, o cümlədən korrupsiyaya qarşı mübarizə sahəsində ixtisaslaşmış hüquq mühafizə orqanlarının və qeyri hökumət təşkilatlarının nümayəndələri iştirak ediblər.

Baş Prokurorluğun mətbuat xidmətindən Trend-ə verilən məlumata görə, təlim kursunda Azərbaycanın Baş Prokurorluğunun Baş prokuror yanında Korrupsiyaya qarşı Mübarizə Baş İdarəsinin Təşkilati və informasiya təminatı idarəsinin prokuroru Ziya Hacıyev təmsil edib.

Tədbir çərçivəsində təqdimatla çıxış edən Z.Hacıyev ölkəmizdə korrupsiyaya qarşı mübarizə sahəsində keçirilmiş kompleks, sistemli və ardıcıl islahatlar, bu sahədə respublikamızın bir çox beynəlxalq təşkilatlar, ixtisaslaşmış qurumlarla ikitərəfli və çoxtərəfli müqavilələr əsasında qarşılıqlı və səmərəli əməkdaşlığı barədə tədbir iştirakçılarına ətraflı məlumat verib, onları maraqlandıran sualları cavablandırıb.

İştirakçılar tərəfindən təqdir edilən ölkəmizin korrupsiyaya qarşı mübarizə modeli, o cümlədən Baş prokuror yanında Korrupsiyaya qarşı Mübarizə Baş İdarəsi və “ASAN” xidmət mərkəzlərinin uğurlu fəaliyyəti kursun təşkilatçıları tərəfindən də korrupsiya ilə mübarizə sahəsində uğurlu və qabaqcıl nümunə qismində vurğulanıb.

Təlimin yekununda Z.Hacıyevə Korrupsiyaya qarşı mübarizə Proqramının uğurla başa çatdırılması ilə əlaqədar sertifikat təqdim edilib.

Məqalədə:
Xəbər lenti

Xəbər lenti