Bakı. Trend:
Ukraynada fəaliyyət göstərən SOCAR yanacaqdoldurma məntəqləri şəbəkəsinin işçi heyəti Xocalı soyqırımı ilə bağlı Azərbaycan xalqı ilə həmrəylik nümayiş etdiriblər.
Trend-in məlumatına görə, Xocalı faciəsinin 27-ci ildönümü ilə əlaqədar “SOCAR Energy Ukraina”nın yanacaqdoldurma məntəqələrində bayraqlar endirilib, faciə qurbanları yad edilib.
Ukraynadakı SOCAR yanacaqdoldurma məntəqələrində soyqırımına dair videoçarx yayımlanıb.
Videoçarxda 1992-ci il fevralın 25-dən 26-na keçən gecə Xocalı şəhərində baş verən XX əsrin dəhşətli faciəsi haqqında maarifləndirici məlumatlar, statistik rəqəmlər, soyqırıma dair fotolar əks olunub. “SOCAR Energy Ukraina” şirkətinin keçirdiyi aksiya YDM-lərdən istifadə etmiş insanlarda faciə ilə bağlı təsəvvürün yaradılmasında xüsusi rol oynayıb və onlar Xocalı soyqırımı haqqında həqiqətləri öyrənə biliblər.