Bakı. Trend:
Azərbaycan Respublikası Nazirlər Kabinetinin ayrı-ayrı istiqamətlərdə müəyyən etdiyi xərc normativlərinə və prosedurlara əməl olunmaması hallarına 15 uyğunluq auditində rast gəlinib.
Trend-in məlumatına görə, bu barədə Hesablama Palatasının 2022-ci ildə fəaliyyəti haqqında Hesabatda qeyd edilir.
Audit sübutlarının təhlili qurumlar tərəfindən müxtəlif növ tədbirlər üzrə qüvvədə olan normativlərə əməl olunmadığını, tədbirlər üzrə təsdiqedici və əsaslandırıcı sənədlərin bəzi hallarda düzgün tərtib edilmədiyini və yaxud ümumiyyətlə tərtib olunmadığını, bəzi hallarda isə təqdim edilmiş sənədlərin əsaslı olmadığını göstərir. Bundan əlavə, hesabat ilində də yanacaq sərfi normasının düzgün tətbiq edilməməsi, istifadəyə yararsız olan nəqliyyat vasitələri üçün təmir və s. xərclərin aparılması, ezamiyyə ilə bağlı və digər normalara əməl edilməməsi hallarına rast gəlinib.
Qeyd edək ki, İqtisadi siyasət, sənaye və sahibkarlıq komitəsinin bu gün keçirilən iclasında Hesablama Palatasının 2022-ci ildə fəaliyyəti haqqında Hesabatı müzakirə edilir.