Bakı. Trend:
Aprelin 12-də Milli Məclisin sədr müavini, parlamentin Gənclər və idman komitəsinin sədri Adil Əliyev vətəndaşların, o cümlədən şəhid ailələri üzvlərinin müraciətlərini dinləyib.
Parlamentin Mətbuat və ictimaiyyətlə əlaqələr şöbəsindən Trend-ə bildirilib ki, görüş zamanı vətəndaşları narahat edən məsələlərlə bağlı lazımi tədbirlər görülüb, onların müraciətlərinin bir qismi yerindəcə həll edilib, sosial, humanitar, məişət və sair mövzularla əlaqədar qaldırılan bir sıra məsələlərin araşdırılması üçün aidiyyəti orqanlara sorğular hazırlanıb.
Müraciət edən vətəndaşlara bildirilib ki, Prezident İlham Əliyevin rəhbərliyi ilə ölkəmizdə əhalinin sosial müdafiəsinin daha da gücləndirilməsi, onların rifah halının daha da yaxşılaşdırılması, şəhid ailələrinin və qazilərin sosial problemlərinin həlli daim diqqət mərkəzindədir. Diqqətə çatdırılıb ki, Azərbaycan Prezidentinin əhalinin müraciətlərinə yüksək həssaslıqla yanaşılması barədə verilən tapşırıq və tövsiyələrə uyğun olaraq, Milli Məclisin sədr müavini Adil Əliyevin ünvanına daxil olan bütün növ müraciətlərə yüksək həssaslıqla yanaşılır, mövcud qanunvericiliyin tələblərinə uyğun olaraq müvafiq tədbirlər həyata keçirilir.