Gürcüstanda yaşayan azərbaycanlılar fevral ayından etibarən yerli telekanallar vasitəsilə Azərbaycan dilində xəbərlərlə tanış olacaqlar. Bu barədə Trend ə Azərbaycan Mətbuat Şurasından məlumat verilib. Bu aydan ATƏT-in maliyyə yardımı ilə Gürcüstan İctimai Televiziyasının yarım saatlıq axşam xəbərləri soydaşlarımız yaşayan Dumanisi, Bolnisi, Qardabani və Marneuli rayonlarında yerli telekanallar vasitəsilə sinxron tərcümədə Azərbaycan dilində yayımlanacaq. ATƏT-in Gürcüstandakı nümayəndəliyinin təmsilçisi Zurab Xirinadze mpi.az saytına açıqlamasında bildirib ki, təmsil olunduğu təşkilat bu yolla ölkədə yaşayan qeyri-gürcü millətlərin məlumat almaqla bağlı çətinliklərini müəyyən qədər aradan qaldırmaq, onların ictimai həyatda daha yaxından iştirakını təmin etmək niyyətindədir.
Qeyd edək ki, Gürcüstanın azərbaycanlılar yaşayan bölgələrində hazırda Azərbaycan dilində çıxan və dövriliyi az olan "Gürcüstan" qəzetindən başqa heç bir nəşr işıq üzü görmür.
