Siyasi partiyalar və ictimai qurumlar ANS-in yayımının dayandırılması ilə bağlı mövqelərini açıqlayıblar.
Trend xəbər verir ki, Azərbaycan Milli İstiqlal Partiyası (AMİP) ANS televiziyası və radiosunun bağlanmasını ölkədə azad mətbuata təzyiqlərin davamı kimi qiymətləndirib. Partiya ölkədə demokratiyanın inkişafının qarşısının alınmasına cəhd kimi dəyərləndirdiyi bu hadisənin həm də Azərbaycanın beynəlxalq aləmdə imicinə zərbə vuracağı qənaətindədir.
Ədalət Partiyası hesab edir ki, ANS-in yayilmasının dayandırılması Qarabağ problemi ilə bağlı Azərbaycana beynəlxalq qurumlar qaşısında əlavə çətinliklər yaradacaq. Bu hadisə söz azadlığının boğulması kimi qiymətləndiriləcək və ölkəmizin qarşısında yeni öhdəliklərin qoyulmasına, problemlərlə qarşılaşmasına səbəb olacaq.
YAP-ın Siyasi Şurasının üzvü, millət vəkili Aydın Mirzəzadə məsələ ilə əlaqədar Trend ə mövqeyini açıqlayarkən deyib ki, telekanalla bağlı çıxarılan qərar Azərbaycanın hüquqi və demokratik dövlət olduğunu, ölkə qanunlarının hamıya şamil edildiyini göstərir: "Bu ölkədə hamı vergi verməli, qanunun tələblərinə əməl etməli, heç kəs özünü əlahiddə vəziyyətdə qoymamalıdır. Çox təəssüf ki, ANS şikətinin son dövrlərdəki fəaliyyətində özünə xüsusi imtiyaz tələb etmək istəyi hiss olunurdu. Qanunları pozmaq, heç bir razılıq olmadan regionda yeni radio açmaq, xarici ölkə telekanallarının verilişlərini dövlətdən heç bir icazə almadan öz dalğasında yayımlamaq ANS-in fəaliyyətində ciddi nöqsanlar idi. Şuranın qərarı göstərdi ki, hər bir hüquqi və fiziki şəxs qanunun tələblərinə hörmətlə yanaşmalıdır"- deyə A.Mirzəzadə vurğulayıb.