Dekabrın 26-da Azərbaycan Respublikası Ali Məhkəməsində "Əl-Qaidə" terror təşkilatının üzvü kimi Bakıda fəaliyyət göstərməkdə təqsirləndirilərək 2006-cı ilin aprel ayında Ağır Cinayətlərə Dair İşlər üzrə Məhkəmənin hökmü ilə müxtəlif müddətlərə azadlıqdan məhrum edilmiş məhkumların kassasiya şikayətinə baxılıb və şikayət təmin olunmayıb. Bu barədə Trend ə Ali Məhkəmədən məlumat verilib.
Məhkəmə iclasına hakim Müzəffər Ağazadə sədrlik edib.
Təşkilatın üzvü kimi fəaliyyət göstərməkdə təqsirləndirilən və mühakimə edilərək cəzalandırılan 15 nəfər Azərbaycan Respublikası Cinayət Məcəlləsinin 120.2, 120.2.3, 279.1, 228.3, 315.1 və s. maddələri ilə ittiham olunublar. Onların bəziləri ilkin məhkəmə instansiyasının hökmü ilə razılaşmayaraq əvvəlcə Apellyasiya Məhkəməsinə, daha sonra isə Ali Məhkəməyə müraciət ediblər.
Ali Məhkəmədə təqsirləndirilən şəxslərin vəkilləri ilkin instansiya məhkəməsinin hökmünün ədalətsiz olduğunu bildiriblər və məhkəmədən müttəhimlər barədə hökmün dəyişdirilərək onların bəzilərinə bəraət, bəzilərinə nisbətən yüngül cəza təyin olunmasını xahiş ediblər.
Lakin Ali Məhkəmədə aparılmış araşdırmanın sonunda Ağır Cinayətlərə Dair İşlər üzrə Məhkəmənin hökmünün qüvvədə saxlanılması barədə qərar çıxarılıb.
