"İndiyədək milislər tərəfindən saxlanılan və Rusiyadan çıxarılmaq təhlükəsi ilə üzləşən təxminən 30-40 azərbaycanlının deportasiya edilməsinin qarşısını ala bilmişik". Bu məlumatı Trend ə Rusiyada miqrasiya haqda yeni qanun qəbul olunandan sonra azərbaycanlılara yardım məqsədilə paytaxt Moskvada yaradılmış qərargahın hüquqşünası Azər Əliyev verib.
O qeyd edib ki, qeydiyyat problemləri ilə əlaqədar qərargaha indiyədək 500-dək müraciət daxil olub. Müraciət edən azərbaycanlılara əsasən, yeni qanunun tələbləri, qeydiyyata düşmək üçün lazımi proseduralar izah edilir. A.Əliyevin sözlərinə görə, ümumilikdə soydaşlarımızla bağlı ciddi problemlər yoxdur. Lakin deportasiya faktları var, çünki Rusiyada soydaşlarımızın hamısı heç də leqal yaşamır və mövcud qanuna tam əməl etmir: "Deportasiya barədə dəqiq faktlar, statistik rəqəmlər söyləmək çətindir. Amma bizim qərargah milis bölmələri ilə danışıqlar aparır və təxminən 30-40 nəfərə lazımi köməklik göstərmişik. Xarici Ölkələrdə Yaşayan Azərbaycanlılarla İş üzrə Dövlət Komitəsi bizimlə sıx işləyir və bu yaxınlarda Komitənin Rusiyaya ezam olunmuş əməkdaşı qərargaha kompüter avadanlığı gətirib. Həmçinin Azərbaycanın Rusiyadakı səfirliyində azərbaycanlılara pasport verilir"-deyə hüquqşünas məlumat verib.
