Azərbaycan, Bakı / Trend müxbir E.Cavadova/ Martın 6-da Ağır Cinayətlərə dair İşlər üzrə Azərbaycan Məhkəməsində keçmiş səhiyyə naziri Əli İnsanovun və onunla birlikdə mühakimə olunan digər 10 nəfərin cinayət işi üzrə məhkəmə iclasında Əli İnsanov keçmiş iqtisadi inkişaf naziri Fərhad Əliyevin məhkəmədə dindirilməsini tələb edib.
Məhkəmə iclası başlayan kimi Əli İnsanov hakimin nəzərinə çatdırıb ki, Səhiyyə Nazirliyinin balansındakı obyektlərin qanunsuz özəlləşdirilməsi ilə bağlı ittihamı qəbul etmir. Çünki bu səlahiyyət Səhiyyə Nazirliyinin yox, İqtisadi İnkişaf Nazirliyi ilə Əmlak Komitəsində olub. Odur ki, Ə.İnsanov həmin vaxt özəddəlşdirməyə rəhbərlik etmiş keçmiş iqtisadi inkişaf naziri (hazırda dövlət çevrilişinə cəhd ittihamı ilə həbsdədir) Fərhad Əliyevin və Əmlak Komitəsinin sədri Kərəm Həsənovun məhkəmədə əlavə şahid qismində dindirilməsini tələb edib. Hakim hazırkı mərhələdə vəsatəti müzakirə edilməmiş saxlayıb və yalnız növbəti məhkəmə iclaslarında vəsatətin müzakirəsini mümkün hesab edib.
Ə.İnsanovun ikinci vəsatəti məhkəmə iclasını işıqlandıran kütləvi informasiya vasitələri ilə bağlı olub. Keçmiş nazir "əgər müstəqil mətbuat məhkəmə zalına buraxılmırsa, o zaman mən tələb edirəm ki, iqtidar mətbuatı və telekanallar da zalda əyləşməsinlər" - deyə hakimdən tələb edib. Hakimsə məhkəmənin KİV-in fəaliyyətinə müdaxilə etmək və qiymət vermək səlahiyyətində olmadığını vurğulayaran vəsatəti təmin etməyib.
Daha sonra zərərçəkən qismində Mingəçvevir Şəhər Xəstəxanası poliklinikasının keçmiş şöbə müdiri Sabir Novruzov ifadə verib. O, məhkəmənin nəzərinə çatdırıb ki, 1994-cü ildə səhiyyə nazirinin sərəncamı ilə işdən çıxarılıb. Bununla bağlı Nəsimi rayon Məhkəməsinə müraciət edib və məhkəmə onun əvvəlki vəzifəsinə bərpa olunmasına dair qətnamə çıxarıb. Lakin Əli İnsanov məhkəmənin qətnaməsini icra etməyib.
Məhkəmə iclası davam edir.
