Azərbaycan, Gəncə / Trend müxbir V.Məmmədov/ Azərbaycanın Gəncə şəhərindəki orta məktəblərin bufetlərində keçirilən reydlərdən sonra şəhərin 2, 16, 40, 42, 36, 13, 12, 9 və 44 saylı orta məktəblərinin bufetləri bağlanıb. Bu barədə məlumatı çərşənbə axşamı şəhər Təhsil İdarəsinin müdiri Mahal Əliyev verib. Onun sözlərinə görə, reydlər zamanı məlum olub ki, şəhərin 17 orta məktəbində yeni bufetlərin tikilməsinə ehtiyac var. Altısında axar suyun olmaması, dördündə isə proflaktik tədbirlərə əməl olunmaması faktları qeydə alınıb.
Əliyev həmçinin qeyd edib ki, hazırda orta məktəblərdə fəaliyyət göstərən bufetlər heç bir quruma tabe deyil. Onlar müstəqil şəkildə fəaliyyət göstərirlər. "Təhsil İdarəsi şəhər İcra Hakimiyyəti ilə belə bir razılığa gəlib ki, xüsusi bir qurum təsis olunsun və bufetlər həmin qurumun tabeliyinə verilsin. Həmin qurum bufetlərdə bütün sanitar qaydalara riayət olunmasına cavabdeh olacaq" - deyə Əliyev bildirib.
Orta məktəblərdə reydləri şəhər İcra Hakimiyyətinin başçısı Eldar Əzizovun göstərişi ilə Gəncə şəhər Təhis İdarəsi, Gigiyena və Epidemialogiya Mərkəzi və İcra Hakimiyyətinin nümayəndələrindən ibarət xüsusi komissiya həyata keçirir.
Təhsil Nazirliyinin içtimaiyyətlə əlaqə şöbəsinirn müdiri Bayram Hüseynzadə də bildirib ki, orta məktəblərdəki bufetlərin inkişafı və oradakı ərzaq məhsullarının keyfiyyətli olması üçün bu cür qurumların yaradılması labüddür. Bu praktika artıq Bakıda tətbiq olunub.
