Azərbaycan, Bakı/ Trend , müxbir K.Zərbalıyeva/ Azərbaycanda cəza çəkən əcnəbi vətəndaşların böyük əksəriyyəti mülkiyyət əleyhinə, narkotik maddələrin qanunsuz dövriyyəsi və qaçaqmalçılığa görə məhkum ediliblər. Bu barədə çərşənbə axşamı Trend ə açıqlamasında ədliyyə nazirinin müavini, Penitensiar Xidmətin rəisi Nazim Ələkbərov məlumat verib. Nazir müavini bildirib ki, bu ilin 7 ayında Rusiyada cəza çəkən 48 Azərbaycan vətəndaşı cəzasının qalan hissəsini çəkmək üçün öz ölkəsinə qaytarılıb. Həmçinin Azərbaycanda cəza çəkən 2 Rusiya vətəndaşı cəzasının qalan hissəsini çəkmək üçün öz ölkəsinə verilib.
Ələkbərovun sözlərinə görə, Penitensiar Xidmətin tabeçiliyindəki müəssisələrdə 20 ölkədən 451 əcnəbi vətəndaş cəza çəkir. Əcnəbi məhkumların böyük hissəsi-146 nəfəri Gürcüstan, 116-sı Rusiya, 98-i İran, 22-si Türkiyə və 14-ü Pakistan vətəndaşlarıdır. Əcnəbi məhkumların 25-i qadınlar, 2-si yetkinlik yaşına çatmayanlar, 4-ü isə ömürlük azadlıqdan məhrum edilmişlərdir.
Ələkbərov bildirib ki, sonuncu amnistiya aktı əcnəbi vətəndaşlara da şamil olunub. Belə ki, 54 əcnəbi məhkum cəzadan azad edilib ki, onlardan da 11-i Rusiya, 13-ü Gürcüstan, 9-u İran, 8-i Əfqanstan, 5-i Pakistan, 2-si Türkiyə, Banqladeş, Ukrayna, 1-i Özbəkstan və Türkmənistan vətəndaşlarıdır.
Xidmətin rəisi bildirib ki, məhkumların cəza çəkməsi üçün öz ölkələrinə verilməsi prosesi Azərbaycanın da tərəfdar çıxdığı "Məhkum olunmuş şəxslərin verilməsi haqqında" 21 mart 1983-cü il tarixli Avropa və "Azadlıqdan məhrum edilmiş məhkumların verilməsi haqqında" 6 mart 1998-ci il tarixli Moskva Konvensiyaları ilə tənzimlənir. Bundan əlavə Azərbaycanın Rusiya, Türkiyə, Ukrayna, Qazaxıstan, Gürcüstan, İran, Özbəkistan, Litva, Qırğızıstan ilə bu barədə ikitərəfli müqavilələri var.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
.jpg)
.jpg)
