Azərbaycan, Bakı/ Trend , müxbir K.Zərbalıyeva/ "Nota Bene" qəzetinin həbsdə olan əməkdaşı Fərəməz Novruzoğlu (Allahverdiyev) yenidən əməliyyat oluna bilər. Bu barədə çərşənbə günü Trend ə Ədliyyə Nazirliyi Baş Səhiyyə İdarəsinin rəisi Rəfael Mehdiyev məlumat verib. Mehdiyev bildirib ki, Allahverdiyev ötən həftənin sonunda Müalicə Müəssisəsinə köçürülüb. Allahverdiyevin düz bağırsaq nahiyəsində şiş olduğunu deyən idarə rəisi bildirib ki, şiş əvvəlki əməliyyatların fəsadı kimi əmələ gəlib: "Allahverdiyev azadlıqda olarkən, 2006-cı ilin sonlarında düz bağırsaqan əməliyyat olunub. O, həmin nahiyədən bir neçə dəfə əməliyyat olunub".
İdarə rəisinin sözlərinə görə, hazırda jurnalist müayinələrdən keçir. Zərurət yaranarsa və Allahverdiyev razılıq verərsə, jurnalist Müalicə Müəssisəsində yenidən əməliyyat olunacaq.
Qızıldaş qəsəbəsindəki 14 saylı cəzaçəkmə müəssisəsində saxlanılan Novruzoğlu (Allahverdiyev) Daxili İşlər naziri Ramil Usubovun və Xaricdə Yaşayan Azərbaycanlılarla İş üzrə Dövlət Komitəsinin sədri Nazim İbrahimovun Cinayət Məcəlləsinin 147-ci (böhtan), 148-ci (təhqir) maddələri ilə xüsusi ittiham üzrə qaldırdıqları iddia ilə bağlı Nərimanov rayon məhkəməsinin 30 yanvar 2007-ci il tarixli hökmü ilə həbs olunub. Apellyasiya Məhkəməsi hökmdən verilən apellyasiya şikayətini təmin etməyib və Nərimanov rayon məhkəməsinin qərarını qüvvədə saxlayıb.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
.jpg)
