Azərbaycan, Bakı, 27 iyul /Trend, müxbir M.Əliyev/
Rusiyanı təmsil edən idmançının doğulduğu şəhər kimi Bakının Rusiya şəhəri göstərməsi XXX London Yay Olimpiya Oyunlarının Təşkilat Komitəsinin kompüter bazasında olan səhvə görə baş verib. Bunu cümə günü Trend-ə Azərbaycan Milli Olimpiya Komitəsinin vitse-prezidenti Çingiz Hüseynzadə bildirib.
"London Olimpiya Oyunlarının Təşkilat Komitəsi SSRİ vaxtı doğulan bütün idmançıların doğulduğu şəhərləri kompüterdə SSRİ olmadığından Rusiyanın ərazisi kimi göstərib. İndi bir-bir həmin səhvləri tapıb dəyişirlər", - Hüseynzadə deyib.
O qeyd edib ki, Təşkilat Komitəsinin nəzərinə bütün yanlışlıqlar barədə məlumat çatdırılıb. "Olimpiadanın Təşkilat Komitəsi səhvə görə rəsmi qaydada üzr istəyib", - o deyib.
Milli Olimpiya Komitəsinin vitse-prezidenti qeyd edib ki, Londonda olan bütün idmançıların əhval-ruhiyyəsi çox yüksək səviyyədədir və onlar yarışlara hazırdırlar.
Azərbaycan idmançıları iyulun 28-də ilk dəfə Olimpiadada mübarizəyə başlayacaqlar.
XXX London yay Olimpiya Oyunlarının rəsmi açılış mərasimi bu gün Bakı vaxtı ilə gecəyarı başlayacaq.