Azərbaycan, Bakı, 5 iyun /Trend/
"Xəzər Lənkəran" klubunun yeni baş məşqçisinin kimliyinə aydınlıq gəlib.
Trend-in klubun rəsmi saytına istinadən verdiyi məlumata görə, komandanın baş məşqçi vəzifəsinə türkiyəli mütəxəssis Oğuz Çətin təyin olunub.
Ötən ilin dekabrından etibarən Mustafa Dənizlinin köməkçisi vəzifəsində çalışan O.Çətin komandanı çempionatın son 4 turunun oyunlarına baş məşqçi qismində çıxarmışdı.
Qeyd edək ki, "Fənərbağça", "Erciyesspor", "Gənclərbirliyi" və "Diyarbakırspor" klublarını çalışdırmış O.Çətin 5 il Türkiyə milli komandasının məşqçilər korpusunda yer alıb. "Xəzər Lənkəran"a gəlişindən öncə işlədiyi son klub "Boluspor" olub.