Bakı. Trend:
Avqustun 23-də Bakıda keçirilən kişilər arasında şahmat üzrə Dünya Kubokunda finalın, eləcə də üçüncü yer uğrunda matçın ikinci partiyası keçirilib.
Trend çərşənbə günü xəbər verir ki, finalda Maqnus Karlsen (Norveç) və Rameşbabu Praqnanandha (Hindistan) oynayır. Ötən gün şahmatçılar finalın birinci partiyasını heç-heç ilə başa vurublar. İkinci partiyada Maqnus Karlsen ağ fiqurlarla oynayıb.
Üçüncü yer uğrunda matçda Nicat Abasov (Azərbaycan) və Fabiano Karuana (ABŞ) qarşılaşacaq. Təkbətək yarışın birinci yarısında Nicat Abasov qalib gəlib. Üçüncü yer uğrunda matçın ikinci partiyasında Fabiano Karuana ağ fiqurlarla oynayıb.
Xatırladaq ki, Beynəlxalq Şahmat Federasiyasının (FİDE) Bakıda keçirilən şahmat üzrə Dünya Kubokunun start siyahısında açıq bölmədə 206, qadınlar bölməsində isə 103 şahmatçı yer alıb. Şahmat üzrə Dünya Kuboku Azərbaycanda ikinci dəfədir keçirilir. İlk dəfə olaraq, 2024-ci il kişi namizədlər turniri və qadın namizədlər turnirində həm açıq, həm də qadın bölmələrindən ən yaxşı üç oyunçu iştirak edəcək.
FİDE Dünya Kuboku 2023 oyunları yarışın rəsmi saytında Azərbaycan və İngilis dillərində yayımlanır. Yarışlar avqustun 25-dək davam edəcək. Kubokun mükafat fondu 2,5 milyon dollar müəyyən edilib.
Bakıda keçirilən qadınlar arasında şahmat üzrə Dünya Kuboku avqustun 21-də başa çatıb. Kubokun qalibi Aleksandra Qoryaçkina (FİDE) olub. İkinci yeri Nurgül Səlimova (Bolqarıstan), üçüncü yeri isə Anna Muzıçuk (Ukrayna) tutub.
FİDE Dünya Kuboku Bakı şəhərində yerləşən "Marriott Boulevard" otelində keçirilir.
(Tərcümə: Rəna Əbdürəhmanova)