Gürcüstan, Tbilisi / Trend , müxbir N.Kirtsxalia/ "Gürcüstan dəmir yol xətti" MMC-nin 99 il müddətinə Britaniyanın "Parkfild invesment" şirkətinin idarəsinə verilməsinə dair müqavilə yaxın zamanlarda imzalanacaq. Bu barədə çərşənbə günü Gürcüstanın iqtisadiyyat naziri Giorgi Arveladze məlumat verib. Müqavilə hazırda işlənib hazırlanmaqdadır.
"Biz artıq investisiya və digər öhdəliklərin ötürüləcəyi Britaniya şirkəti ilə müqavilənin formasını müəyyənləşdirmişik" - deyə o bildirib.
Nazirin sözlərinə görə, Britaniya şirkəti daha sərfəli şərt, yəni birinci 10 il ərzində dəmir yolunun infrastrukturunun inkişafına 1 mlrd. dollar vəsait qoymağı təklif edib.
İnvestisiyaların əsas hissəsi ilk 3-4 il ərzində yatırılacaq. 2009-cu ilə qədər daşınma üzrə bütün tariflər qorunub saxlanacaq, növbəti 5 il ərzində isə, tarif dəyişiklikləri dövlətlə razılaşdırılacaq. "Britaniyalılar, həmçinin, ayrı-ayrı şirkətlərə münasibətdə ayrı-seçkilik xarakteri daşıyan tariflər tətbiq edə bilməzlər" - deyə nazir bildirib.
Arveladze bu müqaviləni "son illər ərzində imzalanan ən iri investisiya layihəsi" adlandırıb. "Dövlət dəmir yolunun inkişafına bu qədər vəsait ayırmaq iqtidarında deyildi və bu səbəbdən də, dəmir yolunun uzunmüddətli icarəyə verilməsinə dair qərar qəbul etdi. Bu, ölkənin ümumi siyasi-iqtisadi inkişafına təsir göstərəcək. Özəl sektor güclü olmalı və iqtisadiyyatı idarə edə bilməlidir"- deyə nazir qeyd edib.