Azərbaycan, Bakı/ Trend müxbir İ.Xəlilova/ Azərbaycan və Almaniya hökumətləri 27-28 noyabrda Bakıda keçirilməsi nəzərdə tutulan hökumətlərarası məsləhətləşmələrin müddətini razılaşdırıblar. Bu barədə çərşənbə axşamı İqtisadi İnkişaf Nazirliyindən bildiriblər. Alman nümayəndə heyətinə Qafqaz, Mərkəzi Asiya və MDB ölkələri ilə iş üzrə Ərazi İdarəsinin rəhbəri Yurqen Çol başçılıq edəcək. Məsləhətləşmələrdə layihələrin maliyyələşdirilməsinin mümkün istiqamətləri müəyyənləşdiriləcək. Gələcək əməkdaşlıq üçün energetika, ekologiya, kommunal infrastruktur sahələrində layihələr təklif olunur. Məsləhətləşmələr 2008-ci ildə keçiriləcək növbəti Azərbaycan-Almaniya hökumətlərarası danışıqlarına hazırlıq çərçivəsində keçiriləcək. Əvvəlki görüş 14 avqust 2006-cı ildə Bonnda baş tutub. Danışıqlarda adətən imzalanmış texniki və maliyyə sənədlərinin vəziyyəti, həmçinin həyata keçirilən layihələrin və gələcək layihələrin perspektivləri müzakirə olunur. Almaniya hökuməti, həmçinin KFW Alman Yenidənqurma Banki və GTZ Alman Texniki Yardım Cəmiyyəti tərəfindən 2008-ci il üçün maliyyə yardımının həcmini dəqiqləşdirmək niyyətindədir.
Axırıncı Azərbaycan-Alman danışıqlarının yekun protokolunda 2007-ci il üçün maliyyə əməkdaşlığı çərçivəsində 9 mln. avro güzəştli kreditlərin, texniki layihələrin reallaşdırılması üçün isə 5 mln. avro qrantların ayrılması nəzərdə tutulub. Əməkdaşlığın əvvəlindən KFW xətti ilə Azərbaycan üçün ayrılmış maliyyə yardımının həcmi 150 mln. avro təşkil edib.