Azərbaycan, Bakı, 13 fevral / " , müxbir Ü.İsmayılova / Yanvarda Bakının ilkin daşınmaz əmlak bazarında yaşayış sahəsinin bir kvadrat metrinin orta qiyməti 0,3 faiz artaraq $1028 olub, çərşənbə günü "Əmlak Bazarı Iştirakçıları" Ictimai Birliyinin yaydığı məlumatda deyilir.
Yanvarda ilkin bazarda təklif portfelinin həcmində azalma müşahidə edilib, tikintisi aparılan bir sıra binalarda satış qismən məhdud xarakter alıb, bu da yeni binalara tələbatın azalması ilə əlaqədardır.
Bakıda yeni tikilən binalara tələbatın azalması avqustda tikilməkdə olan 16 mərtəbəli binanın uçmasından sonra başlayıb. Binanın uçması nəticəsində 25 nəfər həlak olub.
Tikintisi aparılan binaların Bakı şəhəri üzrə orta mərtəbə göstəricisi 15,3 mərtəbə, mənzil sahəsi 121,8 kv.m, mənzildə orta otaq sayı 2.6 təşkil edib.
Azərbaycanın Əmək və Əhalinin Sosial Müdafiəsi Nazirliyi yanında Əmək Müfəttişliyinin məlumatına görə, hazırda Bakıda 800-dən artıq bina tikilir.
