Azərbaycan, Bakı, 19 fevral / müxbir İ.Xəlilova/ Gilan Holding maliyyə-sənaye qrupu öz fəaliyyətini genişləndirir və sement məhsulları istehsalı bazarına daxil olmaq niyyətindədir. 2008-ci il yanvarın 1-dən "vahid pəncərə" prinsipi üzrə hüquqi şəxslərin dövlət qeydiyyatını aparan Azərbaycanın Maliyyə Nazirliyindən çərşənbə axşamı verilən məlumata görə, Holdinq özünün növbəti müəsssisəsini - Gilan Sement Məhdud Məsuliyyətli Cəmiyyəti qeydiyyatdan keçirib.
Bu gün Gilan Holding-in tərkibinə tikinti materialları istehsalı (beton, gips məhsulları, kərpic və s.), kənd təsərrüfatı məhsulları (konservləşdirilmiş məhsulların, təbii şirələrin, alkoqollu içkilər, makaron istehsalı, qoz emalı), yüngül sənaye (gön emalı və s.), turizm (mehmanxana biznesi) sahəsində 20 müəssisə və şirkət daxildir.
Gilan Sement dörd səhm paketinə bölünmüş 40 manat kapitalla qeydiyyatdan keçirilib.
Bu gün Azərbaycanın sementə olan tələbatı ildə üç milyon ton təşkil edir. Lakin ötən həftə iqtisadi inkişaf naziri Heydər Babayevin qeyd etdiyi kimi, yaxın üç ildə sement məhsullarına təlabat yeddi mln. tonadək artacaq. Garadagh Cement ASC Azərbaycanda ən iri klinker və sement istehlaçısı olmaqla, bu bazarın 40 faizə qədərini tutur. Ötən ilin yekunlarına görə, müəssisənin sement satışının həcmi 1,34 mln. ton təşkil edib. Garadagh Cement qarşıdakı üç ildə istehsal həcmini 1,7 mln. tonadək çatdırmağı planlaşdırır.