Azərbaycan, Bakı, 01 mart / Trend , müxbir S.Babayeva/ Azərbaycanın Standartlaşdırma, Metrologiya və Patent üzrə Dövlət Agentliyi cari ildə İsrailin Standartlaşdırma İnstitutu ilə standartlaşdırma, sertifikatlaşdırma, təlim və digər əlaqədar sahələrdə əməkdaşlığa dair müqavilə, Liviya ilə standartlaşdırma, metrologiya və qiymətləndirmə sahələrində əməkdaşlığa dair müqavilə və Macarıstanın Ticarət Lisenziyası İdarəsi ilə metrologiya üzrə texniki əməkdaşlıq barədə qarşılıqlı anlaşma memorandumu imzalamaq niyyətindədir.
Ötən il Dövlət Agentliyi Belarusun Standartlaşdırma üzrə Dövlət Koimtəsi ilə standartlaşdırma, metrologiya, müvafiq qiymətləndirmə və akreditə sahələrində əməkdaşlığa dair müqavilə, Tacikistanla standartlaşdırma, metrologiya, sertifikatlaşdırma akreditə sahəsində hökumətlərarası müqavilə və İordaniyanın Metrologiya və Standartlar Orqanı ilə standartlaşdırma, metrologiya, müvafiq qiymətləndirmə və digər oxşar sahələr üzrə əməkdaşlığa dair müqavilə bağlayıb.
Sənədi imzalayan ölkələr bir-birinin əmtəə və məhsullarına uyğun sertifikatlarını tanıyır, birgə layihələrin reallaşdırılması yolu ilə əməkdaşlığı genişləndirir, müxtəlif proqram və layihələrin reallaşdırılmasınada yardım göstərirlər.
Azərbaycanın Standartlaşdırma, Metrologiya və Patent üzrə Dövlət Agentliyi Azərbaycan prezidentinin 2001-ci il 27 dekabr fərmanına əsasən yaradılıb.
Agentlik standartlaşdırma, metorologiya, standartlaşdırma və sənaye mülkiyyəti obyektlərinin mühafizəsi sahəsində dövlət siyasətini həyata keçirən və formalaşdıran İcra hakimiyyətinin mərkəzi orqanıdır.
