Azərbaycan, Bakı, 11 mart/ " müxbir İ.Xəlilova/ Azərbaycanın Milli Bankının İdarə heyəti martın 11-də manatın dəyərinin valyuta səbətinə nəzərən sabit saxlanılması konsepsiyasının reallaşdırılmasına başlamaq haqqında qərar qəbul edib. İlkin mərhələdə ölkədə ABŞ dolları və avrodan ibarət ikivalyutalı səbət tətbiq ediləcək. Bu valyutaların səbətdə paylarının dəyişməsi mərhələlərlə həyata keçiriləcək.
Milli Bank son mərhələdə ölkənin xarici iqtisadi əlaqələrində dünyanın aparıcı valyutalarının rolunu nəzərə alaraq, səbətin optimal strukturuna nail olmağı nəzərdə tutur. Bu tədbirlər dünya standartlarına uyğun pul siyasətinin təkmilləşdirilməsi və formalaşdırılması çərçivəsində, makroiqtisadi stabilliyi qorumaq məqsədilə həyata keçirilir.
Son illər dünyanın aparıcı valyutalarının məzənnələrinin kəskin tərəddüdləri bir çox ölkələrdə, o cümlədən Azərbaycanda məzənnə siyasəti amilinin əhəmiyyətini daha da artırıb. Belə ki, dünyanın aparıcı valyutalarının məzənnələrində müşahidə edilən əhəmiyyətli tərəddüdlər ölkədə inflyasiya idxalına şərait yaratmaqla bərabər, iqtisadi subyektləri müəyyən dərəcədə məzənnə riskinə həssas edir. Bundan başqa, Azərbaycanda milli valyutanın məzənnəsinin ABŞ dollarına nəzərən formalaşması bu valyutanın dünyanın digər aparıcı valyutalarına qarşı kifayət qədər dəyişkən olması şəraitində Milli Bankın əsas operativ hədəfi olan nominal effektiv məzənnə üzrə hədəfə nail olunması, son nəticədə isə, milli iqtisadiyyatın beynəlxalq rəqabət qabiliyyətinin qorunması kimi vəzifələrin yerinə yetirilməsini mürəkkəbləşdirir.
Martın 1-nə olan vəziyyətə görə, ölkənin AMB-nin sərəncamında olan valyuta ehtiyatları $4015,5 mln. təşkil edib.
