Azərbaycan, Bakı, 19 mart/ Trend / Rusiya maşın və avadanlıqlarının Azərbaycana ixracı Azərbaycan tərəfindən qaz idxalının dayandırılması və Bakı-Novorossiysk boru kəməri üzrə neft tranzitinin azaldılmasına baxmayaraq, 2007-ci ilin yanvar-oktyabrında mal dövriyyəsini $1,3 mlrd.-a çatdırmağa imkan verib. Bu barədə Rusiya XİN-in 2007-ci ildə RF-nin xarici siyasət və diplomatik fəaliyyətinə dair icmalında deyilir.
2007-ci ilin əvvəlindən Azərbaycanın qaz idxalını dayandırmasına səbəb "Qazprom" tərəfindən qazın hər 1000 kubmetri üçün qiyməti $110-dan $235-dək artırması olub. Qaz idxalını dayandıranadək Azərbaycan Rusiyadan ildə təqribən 4,5 mlrd. kubmetr qaz alıb. Ötən il Azərbaycan öz qazının hasilatını artırıb və nəticədə bu təkcə daxili bazarı təmin etməyə deyil, 1000 kubmetri üçün $120 qiyməti üzrə Gürcüstana yanacaq idxalını həyata keçirməyə də imkan verib.
Bundan əlavə, Bakı-Novorossiysk boru kəməri ilə neft nəqlinin azaldılması Rusiya qazının idxalından imtina ilə əlaqədar olub. 2007-ci ildə Azərbaycan özünün neft emalı zavodlarında neft emalı və elektrik stansiyalarında elektrik enerjisinin alınması üçün yanacaq kimi istifadə edilən mazut istehsalı həcmini artırıb. Azərbaycan idxalın azaldılmasınadək Novorossiysk limanına hər il 2,5 mln. ton neft nəql edib.
Azərbaycan bu il də Rusiyadan qaz almayacaq. Əksinə, ARDNŞ Rusiya tərəfinə Azərbaycan qazını 1000 kubmetrinə görə $235 qiyməti ilə almağı təklif edib. Bundan əlavə, digər ixrac marşrutları olduğu üçün Bakı-Novorossiysk neft kəməri ilə neft ixracının nəzərəçarpacaq dərəcədə artacağı gözlənilmir.
