Azərbaycan, Bakı, 30 mart / Trend , müxbir S.Əliyev/ "Şimal-Cənub" beynəlxalq nəqliyyat dəhlizi layihəsi çərçivəsində növbəti iclas iyun ayında Bakıda keçiriləcək. Bu qərar Azərbaycan, Rusiya və İran dəmiryol administrasiyaları rəhbərlərinin bu həftə Tehranda keçirilən görüşünün yekunu üzrə qəbul olunub. Bu barədə bazar günü Azərbaycanın Dəmir Yolu İdarəsindən bildiriblər.
Tehranda keçirilən görüş zamanı tərəflər Qəzvin-Rəşt-Astara (İran-Azərbaycan) dəmir yolunun tikintisi üzrə konsorsiumun yaradılması şərtləri barədə razılığa gəliblər.
"Şimal-Cənub" nəqliyyat dəhlizi layihəsi Avropadan Rusiya, Azərbaycan və İrandan vasitəsilə Hindistana və Cənub-Şərqi Asiya ölkələrinə vahid dəmiryol əlaqəsinin yaradılmasını nəzərdə tutur.
İşlərin böyük hissəsi Azərbaycanla sərhədə qədər dəmiryolu əlaqəsinə malik olmayan İranda görülməlidir. Azərbaycanın nəqliyyat ekspertləri Azərbaycanın bu layihənin reallaşdırılması üçün tələsməsinə ehtiyac olmadığını bildirirlər. Respublika ərazisində görülməsi nəzərdə tutulan işlərin həcmi böyük deyil. Astara stansiyasına qədər (AR) təxminən 8,5 km dəmir yolunun çəkilməsi, təkər cütünün dəyişdirilməsi üzrə sistemli stansiya, sərhəd və gömrük infrastrukturunun tikilməsi nəzərdə tutulur.
Həmçinin İranla paritet əsaslarla reallaşdırılacaq sərhəd boyunca dəmiryolu körpüsünün tikilməsi də lazımdır.
Müəlliflə əlaqə saxlamaq üçün elektron ünvan : [email protected]
