Azərbaycan, Bakı, 24 aprel / Trend , müxbir S.Əliyev/ Azərbaycan Dövlət Dəmir Yolunun səhmləşdirilməsi 2010-cu ildə baş verə bilər. Bu barədə Azərbaycan nəqliyyat nazirinin müavini Musa Pənahov bildirib.
Yaxın günlərdə "2008-2011-ci illər üçün Azərbaycan dəmir yolunun inkişafı üzrə Dövlət Proqramı"nın təsdiqi və gerçəkləşdirilməsi gözlənilir. Proqramın gerçəkləşdirilməsi həmçinin, dəmir yolunun səhmləşdirilməsini də nəzərdə tutur. Proqramın reallaşdırılmasının ümumi dəyəri 1 mlrd. 252 mln. manatdır. İlkin mərhələdə 759 mln. manat sərf olunacaq ki, onun 450 mln. dollarını Dünya Bankı kreditlə ödəyəcək. Cari ildə dövlətin sərmayə proqramı çərçivəsində ölkənin dəmir yoluna 9 mln. manat ayrılması nəzərdə tutulub.
Proqram çərçivəsində 50 lokomativin əldə olunması planlaşdırılır. İlkin mərhələdə 240 kilometrlik Bakı-Böyük-Kəsik dəmir yolu ( 503 km uzunluğu olan Gürcüstan sərhədinə qədər olan yolun bir hissəsi) tamamilə yenidən qurulacaq. Yolun yenidən qurulması qatarların sürətinin saatda 100 kilometrədək artmasına imkan yaradacaq. Hazırda orta sürət təxminən saatda 80 km təşkil edir.
Proqram dəmir yolunun lokomativ və vaqon parklarının yenidən qurulmasını, enerji təsərrüfatı, rabitə və siqnallar sistemi, yol təsərrüfatı və digər infrastrukturun bərpasını nəzərdə tutur.
Müəlliflə əlaqə saxlamaq üçün elektron ünvan: [email protected]