Azərbaycan, Bakı, 14 may / Trend , müxbir İ.Xəlilova/ Azərbaycan hökuməti Ümumdünya Ticarət Təşkilatının (ÜTT) işçi qrupu ilə danışıqların növbəti (altıncı) mərhələsinin 2008-ci ilin sonunadək keçiriləcəyinə ümid edir. Bu barədə çərşənbə günü danışıqlar qrupunun rəhbəri, Azərbaycanın xarici işlər nazirinin müavini Mahmud Məmmədquliyev bildirib.
Buna qədər mal və xidmətlər üzrə yeni təkliflərin təqdim edilməsi, həmçinin, Azərbaycan qanunvericiliyinə dəyişikliklər planının reallaşdırılmasının başa çatdırılması lazımdır. Prezidentin sərəncamına görə, Avropa standartlarına müvafiq normativ-hüquqi aktların unifikasiyası 2007-ci ilin sonunadək başa çatdırılmalı idi.
"Biz danışıqların beşinci mərhələsi zamanı ÜTT-yə üzv dövlətləri bu müddətin 2008-ci ilin sonunadək uzadılması barədə məlumatlandırdıq. Bu müddətin yenidən dəyişdirilməsi yaxşı başa düşülməyəcək və ola bilsin ki, danışıqlar zamanı öz əksini tapsın" - deyə Məmmədquliyev bildirib. [Azərbaycan ilə ÜTT arasında danışıqların beşinci mərhələsi mayın 6-da Cenevrədə keçirilib]
Nazir müavininin sözlərinə görə, bu günədək yeni qanunvericilik aktı və qüvvədə olan normativ-hüquqi aktların dəyişdirilməsi haqqında 40 sənəddən 30-nun layihəsi hazırlanıb. Onlardan bəziləri artıq Parlament tərəfindən qəbul olunub.
"Ümumilikdə, ÜTT-yə üzv dövlətlər danışıqlarda Azərbaycanın bu təşkilata daxil olması ilə bağlı üzrə hazırlıq proseslərində tərəqqinin olduğunu qeyd edib", - deyə danışıqlar qrupunun rəhbəri bildirib.
Bu günədək Azərbaycan ÜTT ilə beş görüş keçirib. İlk iki görüş xarici ticarət rejimi məsələlərinin müzakirəsinə həsr olunub. 2005-ci ildən başlayaraq, son üç görüşdə ölkə tammiqyaslı danışıqlara başlayıb. İki tərəfli danışıqlar mal və xidmətlərin Azərbaycan bazarına daxil olması, kənd təsərrüfatına çoxtərəfli - daxili dəstək və bu sahədə ixrac üzrə maliyyə yardımları ilə bağlı aparılır.
Azərbaycan 1997-ci ildən ÜTT-də müşahidəçi statusuna malikdir.
Müəlliflə əlaqə saxlamaq üçün elektron ünvan:: capital
