Azərbaycan, Bakı, 15 may / Trend / Bakıda may ayının 26-28 "Şimal-Cənub" beynəlxalq nəqliyyat dəhlizinin reallaşdırılması layihəsi çərçivəsində İşçi qrupların üçtərəfli görüşü keçiriləcək. Bu haqda Azərbaycan Dəmir Yol İdarəsindən yayılan məlumatda bildirilib.
Görüş zamanı Qəzvin-Rəşt-Astara-Astara (Azərbaycan) xətlərinin inşa layihəsı məsələləri, üçtərəfli əməkdaşlığın genişləndirilməsi və həmçinin digər məsələlər də müzakirə olunacaq.
"Şimal-Cənub" nəqliyyat dəhlizi layihəsi Rusiya, Azərbaycan və İrandan keçməklə Avropadan Hindistan və Cənub-Şərqi Asiyaya vahid dəmir yolu nəqliyyat xəttinin yaradılmasını nəzərdə tutur. Layihənin reallaşdırılması üçün 400 mln.$-dan artıq maliyyə vəsaiti tələb olunur. Nəzərə almaq lazımdır ki, işlərin böyük hissəsi, Azərbaycan sərhədlərinə qədər dəmir yolu olmayan İranda aparılacaq. 20 mln.$ dəyərində müəyyən işlər isə Azərbaycanda həyata keçiriləcək.
Azərbaycan ərazisində nəzərdə tutulan işlərin həcmi böyük deyil. Astara (AR) stansiyasına qədər yolun təxminən 8,5 km sahəsində təkər cütlüklərinin dəyişdirilməsi üzrə stansiyanı, sərhəd və gömrük infrastrukturunu inşa etmək lazımdır. Həmçinin dəmir yolu sərhəd körpüsünün inşası nəzərdə tutulub. Lakin bu layihənin reallaşdırılması İranla bərabərlik əsasında baş tutacaq.
Proqnozlara görə, ilkin mərhələdə bu dəhliz vasitəsilə ildə 5 mln. ton, gələcəkdə isə 10-15 mln. tonadək yük həcmi planlaşdırılır.