Azərbaycan, Bakı, 15 may/ Trend , müxbir E.İsmayılov/ Noyabrda iqtisadi əməkdaşlıq üzrə Azərbaycan-Kuba hökumətlərarası komissiyanın ikinci iclasını keçirmək planlaşdırılır. Bu barədə cümə axşamı Bakıda, Kubanın Ticarət Palatasının sədri Raul Bassero məlumat verib.
Basseronun sözlərinə görə, hazırda Kubadan Azərbaycana əczaçılıq preparatlarının ixracı məsələsi nəzərdən keçirilir. Kuba lisenziyalaşdırılmış dərman preparatlarını dünyanın 50-dən çox ölkəsinə ixrac edir.
Kubalı nümayəndə bildirib ki, Kuba, rentabelli olduğu halda, Azərbaycanın istehsal etdiyi bəzi qida məhsullarının idxalı məsələsini nəzərdən keçirir, bu istiqamətdə əməkdaşlığı genişləndirmək planlaşdırılır.
Bu gün Kubada yeni neft-qaz yataqlarının axtarışı, neft emalı zavodlarının emal gücünün artırılması üzrə işlər aparılır. Əvvəllər Kuba Azərbaycan istehsalı olan neft-qaz avadanlığı alıb. Kuba neftçiləri bir ay əvvəl Bakıda olublar. "Biz bu məsələ üzrə gələcək əməkdaşlığa ümid edirik", - Bassero qeyd edib..
2007-ci ilin sonunda, Azərbaycanın iqtisadi inkişaf nazirinin başçılıq etdiyi nümayəndə heyəti, Havanada keçirilən ikinci regional biznes-forumda iştirakla bağlı, Kubaya səfər edib və biznes-forum çərçivəsində, Kuba və Azərbaycan şirkətləri arasında Azərbaycan şərabları, konyakları və digər spirtli içkilərinin Kubaya satışı haqqında Niyyət protokolları imzalanıb. Kubadan Azərbaycana rom və siqar idxalı üzrə protokollar imzalanıb.