Azərbaycan, Bakı, 23 may/ Trend , müxbir İ.Xəlilova/ Dünya Bankı (DB) "Azərbaycanda sosial müdafiənin inkişafı" layihəsi üçün güzəştli kreditin həcmini $25 mln.-dan $26,7 mln.-dək artırıb. Bu barədə cümə günü bankın Bakı nümayəndəliyindən məlumat veriblər. Bununla əlaqədar layihənin dəyəri də dəyişikliklərə uğrayaraq $47,4 mln.-dan $54,6 mln.-dək artıb.
Layihənin DB Direktorlar Şurasında mayın 27-də təsdiqlənəcəyi gözlənilir. Kredit sazişi üzrə danışıqlar aprelin 25-də keçirilib. Sazişə əsasən, bankın krediti Beynəlxalq İnkişaf Assosiasiyasının şərtləri əsasında (10 il güzəştli dövr olmaqla 35 ilə və illik 0,75 faiz dərəcəsi ilə) olacaq.
Layihəyə dörd komponent daxildir: əmək bazarının müasirləşdirilməsi, o cümlədən əmək qanunvericiliyinin, əməyin mühafizəsi sisteminin, məşğulluq idarələrinin işinin təkmilləşdirilməsi; sosial təminat sistemi siyasətinin formalaşdırılması; pensiya sisteminin müasirləşdirilməsi və layihənin idarə edilməsi.
Layihə çərçivəsində peşə təhsili sisteminin tam institusional inkişafı və müasirləşdirilməsi, Avropa təcrübəsi əsasında peşəkar təsnifat mütəxəssislərinin hazırlanması nəzərdə tutulur. Nazirliyin nəzdində peşə təhsili mərkəzlərini açmaq nəzərdə tutulur.
Layihə reallaşdırılma dövrü nəzərə alınmaqla 5 ilə - 2008-2013-cü illərə hesablanıb.
DB sosial sektorda artıq bir layihəni maliyyələşdirib. 2005-ci ildən "Pensiya islahatları və sosial təminat" layihəsi reallaşdırılır. Bu layihəyə bank tərəfindən $10 mln. ayrılıb.
Mayın 23-nə olan rəsmi məzənnə - 0,8235 AZN/USD.
Müəlliflə əlaqə saxlamaq üçün elektron ünvan: [email protected]
