Azərbaycan, Bakı, 23 may / Trend , müxbir U.İsmayılova/ Azərbaycanın daşınmaz əmlak bazarı yay mövsümünə keçir. Bu dövr ərzində bazarda fəallıq azalacaq. Mayın birinci yarısında bazarın fəallığı ilin əvvəlinə nisbətdə 27 faiz aşağı düşüb. Bu barədə cümə günü "MBA group" konsaltinq şirkətinin baş direktoru Nüsrət İbrahimov bildirib.
"Daşınmaz əmlak bazarı bu il yay mövsümünə olduqca tez keçib. Əgər əvvəllər may ayında azalma aprel ayın nisbətdə 20 faiz təşkil edirdisə, bu il bu göstərici 45 faiz təşkil edib", - deyə İbrahimov bildirib.
Onun sözlərinə görə, yay ayları ərzində bazarın fəallığı daha 35 faiz azalacaq.
O qeyd edib ki, aprel ayında satışa təxminən 4 min daşınmaz əmlak obyekti təklif olunub ki, bunlardan 600-ü təkrar, təxminən 2 mini isə ilkin bazarın payına düşüb. Bunların əsas hissəsi torpaq və kommersiya obyektlərinin payına düşüb.
İbrahimov əlavə edib ki,bazarda fəallığın bərpa olunması sentyabrın ikinci yarısında gözlənilir.
Ekspert həmçinin bildirib ki, fəallığın azalmasına ölkədə inflyasiyanın səviyyəsi də təsir göstərib. Rəsmi məlumatlara görə, yanvar-apreldə inflyasiyanın səviyyəsi illik hesablamalar üzrə 17,8 faiz təşkil edib. Onun sözlərinə görə, əhali öz pulunu mühafizə etmək məqsədi ilə onları hər hansı bir sahəyə, o cümlədən daşınmaz əmlaka yatırmır və bu da fəallığın azalmasına təsir edən əsas amillərdən biridir.
Azərbaycanın daşınmaz əmlak bazarı 1995-ci ildən 2007-ci ilin avqustuna qədər buma məruz qalıb. Ötən il Bakının mərkəzi küçələrinin birində tikilməkdə olan 16 mərtəbəli bina uçmuşdu və nəticədə 25 nəfər insan həlak olmuşdu. Bu hadisədən sonra bazarın fəallığı kəskin şəkildə 34 faizə qədər azaldı.
Məqalə müəllifi ilə əlaqə ünvanı: [email protected]