Azərbaycan, Bakı, 26 may/ Trend , müxbir İ.Xəlilova/ Azərbaycan Milli Bankı Mərkəzləşdirilmiş Kredit Reyestrində informasiya mübadiləsi prosesini on-line rejimə keçirmək üçün hazırlıq işlərini başa çatdırıb. Bu barədə AMB-nin Statistika və Araşdırmalar Departamentinin direktoru Emin Hüseynov məlumat verib. Onun sözlərinə görə, bu gün MKR-in yeganə istifadəçiləri olan banklar iyunun əvvəlindən avtomatlaşdırılmış rejimdə saytdan borc götürənlərin kredit tarixlərinin yoxlanılması üçün zəruri informasiya ala biləcəklər. İndiyədək Milli Bank onu banklara kağız daşıyıcılarda təqdim edir.
Hazırda reyestrin məlumat bazası tamamilə yenilənib və hər bankla sistemin sınaqdan keçirilməsi üçün fərdi iş aparılır.
Bu fikir banklar tərəfindən ümumi dəstək qazanıb. Belə ki, kredit yatırımlarının artması ilə borc götürənlərin kredit tarixlərinin yoxlanılması üçün sorğular artır ki, bu da öz növbəsində Milli Bankda sorğulara baxılma müddətini artırır.
Mövcud qaydalara əsasən, AMB üç bank günü ərzində bankların soğrularına cavab verə bilər. Lakin onlardan bəziləri üçün hətta bu müddət uzun görünür. Belə ki, banklar potensial müştərilərin kreditlərə dair sorğularına operativ şəkildə reaksiya göstərmək istəyirlər.
Hüseynov bildirib ki, strategiyaya əsasən, on-line rejimə keçiddən sonra, MKR-də uçot sisteminin təkmilləşdirilməsi, reyestrin monitorinqinin aparılması nəzərdə tutulur.
MKR-in işinin təkmilləşdirilməsi, xüsusilə də etibarlılığın artırılması, məlumat mübadiləsi prosesinin sürətləndirilməsi ilə əlaqədar, Ədliyyə Nazirliyinin qeydiyyatında olan "Mərkəzləşdirilmiş Kredit Reyestri haqqında" Qaydalara dəyişikliklər edilib.
Strategiyaya əsasən, Milli Bank gələcəkdə MKR-i kommersiya banklarının idarəsinə verməyə hazırlaşır. MKR-nin kommersiya əsasına keçirilməsi kredit reyestrinin inkişafı üzrə tədbirlərin həyata keçirilməsindən sonra baş verəcək.
AMB nümayəndəsinin rəyinə görə, 1,5-2 il ərzində MKR Milli Bankdan kənarda effektli və gələcək institusional inkişaf üçün hazır ola bilər. Bu, AMB-nin strateji məqsədidir və kredit reyestri sistemində təkmilləşdirmələr, mükəmməlləşdirmələr həmçinin bankların özlərindən asılıdır. Sistem hələ ki, tam gücü ilə işləmir. Bu, bankların onun xidmətlərindən nə qədər fəal istifadə edəcəklərindən asılıdır.
Bu gün MKR-də yalnız banklar iştirak edirlər. Lakin poçt bankları yaradıldıqdan sonra, onlar da kredit reyestrinə daxil ediləcəklər. Hüseynov hesab edir ki, sığorta və lizinq şirkətləri, bank olmayan kredit təşkilatları, ola bilsin ki, ticarət müəssisələri, mobil rabitə operatorları MKR-ə çıxışa malik ola bilərlər.
Mayın 26-na olan rəsmi məzənnə 0,8235 AZN/USD.
Müəlliflə əlaqə saxlamaq üçün elektron ünvan: [email protected]
