Azərbaycan, Bakı, 27 may / TrendCap , müxbir Ü.İsmayılova/ İyunda "Caspian International Investment Company" ("CIIC") təqdimat mərasimində iştirak etməyə və kredit cəlb etməyə hazırlaşdığı investisiya layihələrinin təqdimatını keçirəcək. Bu haqda "Azərbaycan İnvestisiya Şirkəti" (AİŞ) SC-nin icraçı direktoru Anar Axundov çərşənbə axşamı məlumat verib. "CIIC" 2007-ci ilin noyabrında AİŞ və özəl sektorun inkişafı üzrə İslam Korporasiyası tərəfindən təsis olunub.
Axundovun sözlərinə görə, "CIIC" altı investisiya layihəsində iştirak etməyi planlaşdırır. AİŞ-in rəhbəri layihələrin mahiyyətini və adlarını açıqlayıb.
"Layihələr investorlara təqdim olunmaq üçün hazırlanır", - Axundov əlavə edib.
AİŞ-in "Caspian International Investment Company" şirkətinin kapitalında iştirak payı 14 milyon dollaradək (25 faizədək) təşkil edir. "CIIC" Fars körfəzi və Yaxın Şərq regionundakı investisiya şirkətlərini cəlb etməklə, həm Azərbaycanda, həm də ölkə hüdudlarından kənarda fəaliyyət göstərəcək. Sərmayə yatırmaq üçün prioritet sektorlar arasında kənd təsərrüfatı, loqistika, əczaçılıq, tikinti materiallarının istehsalı və xidmət sahələri müəyyən olunub.
Müəlliflə əlaqə saxlamaq üçün elektron ünvan: [email protected]
