Azərbaycan, Bakı, 03 iyun / Trend , müxbir İ.Xəlilova/ Azərbaycan hökuməti ölkənin ərzaq təhlükəsizliyinin təmin edilməsi üzrə Dövlət Proqramının hazırlanmasına dair iş aparır. Proqramın hazırlanmasına, Azərbaycan prezidentinin 2008-ci il 1 may tarixli sərəncamına müvafiq olaraq, üç ay vaxt ayrılıb. Bu barədə çərşənbə axşamı ölkənin Baş naziri Artur Rasizadə bildirib.
"Proqrama bu istiqamətdə lazımi tədbirlərin bütün spektrlərı daxil edilib. Bura elektrik verilişi xətlərinin çəkilməsindən tutmuş, zeytun bağlarının inkişaf etdirilməsi kimi tədbirlər aiddir. Dövlət Proqramının təsdiq edilməsini gözləmədən artıq işlərə start verilib", - deyə hökumət başçısı bildirib.
Baş nazir taxıl yığımı məsələsinə də toxunub. Onun sözlərinə görə, taxılın həcmi keçən ilki göstəriciləri ötəcək. O, bu il Azərbaycanda taxılla bağlı problemin olmayacağını bildirib.
Onun sözlərinə görə, hökumət Quşçuluq Müəssisələri Birliyinin yem idxalının ƏDV-dən azad edilməsi ilə bağlı təklifini də nəzərdən keçirir. Lakin bu qərar daxili bazarda səmərəlilikdən (Yem istehsalı həcmindən) asılı olacaq.
Dövlət Proqramının hazırlanmasına ərzaq təhlükəsizliyinin təmin edilməsi problemi ilə məşğul olan bütün dövlət strukturları cəlb olunur və bu istiqamətdə dünya təcrübəsindən istifadə edilir.
