Azərbaycan, Bakı, 17 iyun/ Trend , müxbir İ.Xəlilova/ Bank olmayan kredit təşkilatı CredAgro Beynəlxalq Maliyyə Korporasiyası (BMK) ilə kiçik və orta biznesin inkişafı üçün $4 mln. kreditin cəlb edilməsi barədə danışıqları başa çatdırıb. Bu barədə çərşənbə axşamı CredAgro-dan məlumat veriblər. Kredit müqaviləsinin iyunun sonunda imzalanacağı gözlənilir.
BMK-nın kredit ehtiyatları kiçik və orta sahibkarlığın maliyyələşdirilməsi üçün nəzərdə tutulub.
Bu gün CredAgro-nun cəlb etdiyi vəsaitlərin ümumi həcmi $30 mln. təşkil edir. CredAgro ,bank olmayan kredit təşkilatı kimi, məhdud lisenziya ilə işləyir və kreditlər cəlb olunan vəsaitlər hesabına ayrılır. O, 15 beynəlxalq maliyyə təşkilatı, xarici investisiya fondları və digər sərmayədarlarla əməkdaşlıq edir. Onların arasında AYİB, İsveçrənin Dexia/ Blue Orchard Mikromaliyyələşdirmə Fondu və s. var.
CredAgro-nun cari portfeli 44 mln. manat təşkil edir. İlin sonunadək onu 50 mln. manatadək çatdırmaq planlaşdırılır.
CredAgro 2000-ci ildə, ACDI-VOCA beynəlxalq humanitar təşkilat tərəfindən təsis edilib. Təşkilatın Nizamnamə kapitalı $5 min, ümumi kapitalı isə 7 mln. manat təşkil edir.
Bu gün CredAgro-nun fəaliyyəti regionlarda layihələrin maliyyələşdirilməsinə yönəlib və 27 rayonu əhatə edir, 9 nümayəndəlik yaradıb və yardımçı ofisləri var. Kredit ayırdığı sahələr müxtəlifdir - kənd təsərrüfatı kreditləşməsi, ticarət əməliyyatları, infrastruktur, lizinqin maliyyələşdirilməsindən istehlak kreditləşməsinədək - ipotekadan başqa, demək olar ki, bütün istiqamətlər. CredAgro-nun kreditləri illik 36 faizədək dərəcə ilə və üç il müddətinə verilir. Kreditin maksimal məbləği 50 min manatdır, bəzi halda bu məbləği ötə də bilər.
İyunun 17-nə olan rəsmi məzənnə - 0,8176 AZN/USD.
Müəlliflə əlaqə saxlamaq üçün elektron ünvan: [email protected]
